13 верасня, Віцебск /Вольга Багачова - БЕЛТА/. Тыдзень спорту і здароўя пройдзе ў Віцебскай вобласці 17-25 верасня, паведамілі карэспандэнту БЕЛТА ва ўпраўленні фізічнай культуры, спорту і турызму Віцебскага аблвыканкама. У Віцебску рэспубліканская акцыя адкрыецца маштабнай спартакіядай, якая адбудзецца на базе Цэнтральнага спартыўнага комплексу "Дынама". Удзельнікамі мерапрыемства стануць каля 1,5 тыс. навучэнцаў розных школ абласнога цэнтра і Віцебскага раёна. Хлопцы будуць спаборнічаць у сіле, спрыце і хуткасці, а таксама ўбачаць паказальныя выступленні спартсменаў, наведаюць з экскурсіяй алею Алімпійскай славы ЦСК. Спартыўныя запалы будуць бушаваць у гэты дзень і каля ракі Віцьба - любімага месца адпачынку жыхароў Віцебска. Тут школьнікі стануць удзельнікамі і гледачамі матчавай сустрэчы па міні-футболе. Сярод іншых буйных мерапрыемстваў - абласная спартакіяда для дзяцей з асаблівасцямі псіхафізічнага развіцця. Каля 50 падлеткаў 12-14 гадоў спецыялізаваных школ рэгіёна 17-18 верасня пазмагаюцца ў настольным тэнісе, валейболе, міні-футболе, лёгкай атлетыцы. Да правядзення акцыі прымеркавана правядзенне 14-16 верасня спецыялізаванай выставы-кірмашу "Віцебшчына - за здаровы лад жыцця-2011". Аб удзеле ў ёй заявілі больш за 50 прамысловых прадпрыемстваў, лячэбных, адукацыйных і грамадскіх арганізацый Віцебска, якія прадстаўляюць шырокі спектр прадукцыі і паслуг, што спрыяюць здароваму ладу жыцця. Шматлікія мерапрыемствы будуць арганізаваны падчас Тыдня спорту і здароўя таксама на спартыўных пляцоўках вобласці. "У кожным горадзе, раённым цэнтры, навучальных установах пройдуць спартыўныя спаборніцтвы, спартакіяды, інтэлектуальныя і забаўляльныя віктарыны і конкурсы, прысвечаныя спорту, да ўдзелу ў якіх плануецца прыцягнуць максімальную колькасць людзей рознага ўзросту", - сказалі ва ўпраўленні, падкрэсліўшы, што галоўная задача ўсёй акцыі заключаецца ў прапагандзе здаровага ладу жыцця як галоўнага фактару добрага настрою і самаадчування.-0-

БЕЛТА