Грандыёзны Форум патрыятычных сіл, прысвечаны Дню народнага адзінства і арганізаваны Штабам патрыятычных сіл, прайшоў у сталічным Палацы спорту. Прыбылі дэлегацыі ўсіх рэгіёнаў краіны, у тым ліку 150 чалавек ад Віцебшчыны на чале з намеснікам старшыні аблвыканкама Вячаславам Дурновым: прадстаўнікі органаў улады, палітычных партый, грамадскіх арганізацый, прадпрыемстваў розных сфер дзейнасці, моладзь.



Аб гераічнай гісторыі нашай краіны, яе складаных перыядах, мужнасці, стойкасці і мудрасці беларускага народа, нацыянальных традыцыях і генетычным кодзе – дыялог ішоў пра тое, што ляжыць у аснове адзінства. Проста і шчыра пра складаныя рэчы.

Вядомыя палітыкі, лідары меркаванняў, грамадскія дзеячы выступілі ў якасці спікераў. Заслужаны работнік сельскай гаспадаркі Рэспублікі Беларусь, старшыня Пастаяннай камісіі Савета Рэспублікі па заканадаўстве і дзяржаўным будаўніцтве Міхаіл Русы нагадаў пра сімвалічнасць правядзення свята ў мінскім Палацы спорту. Менавіта дэлегаты першага Усебеларускага народнага сходу ў кастрычніку 1996 года, «з заміраннем сэрца і пачуццём найглыбейшай надзеі і ўпэўненасці» слухалі праграмнае выступленне кіраўніка дзяржавы. Тут жа аднагалосна падтрымалі новы фармат інстытута прэзідэнцтва, пры якім Прэзідэнт краіны з'яўляецца кіраўніком дзяржавы, гарантам Канстытуцыі і правоў чалавека.

Як прызнаўся Міхаіл Русы, ён нарадзіўся і вырас у вёсцы і прысвяціў жыццё зямлі і развіццю аграпрамысловага комплексу.

Шчырая размова

На гісторыю сваіх сем'яў і краіны заклікала азірнуцца старшыня Беларускага прафсаюза работнікаў адукацыі і навукі Таццяна Якубовіч. Яна падкрэсліла, што дзякуючы адзінству беларускі народ пераадолеў усе цяжкасці і выклікі, і сёння ў нас моцная, квітнеючая краіна, дзе кожны добрасумленна працуе на вынік.

Адзінства само па сабе не нараджаецца, а будуецца на даверы, шчырых дыялогах і разуменні адзін аднаго, абазначыла старшыня Беларускай партыі «Белая Русь» Вольга Чэмаданава. Паводле яе слоў, у свеце, які дынамічна змяняецца, «калі вакол шмат выклікаў і пагроз, прыйшоў час аб'ядноўвацца не па прымусе, а па выбары». У гэтым залог спакою дзяцей, стабільнасці і развіцця ўсіх сфер дзейнасці: эканомікі, адукацыі, навукі, культуры.

З захапленнем зала сустрэў і маці пяцёрых дзяцей, члена Беларускага саюза жанчын і арганізатара конкурсу «Прыгажуня Беларусі» Аляксандру Нікіфараву. Яна нагадала: менавіта жанчыны-маці заўсёды былі захоўнікамі гісторыі, культуры, мовы і слаўных традыцый. У цяжкія часы «ля калыскі малога праз мацярынскую песню перадавалася тое, што робіць нас беларусамі».

Аляксандра Нікіфарава рэзюмавала: чым мацнейшая сям'я, чым больш упэўненасць жанчыны ў заўтрашнім дні, тым больш устойлівая наша дзяржаўнасць.

Шмат гаварылі пра тое, як растлумачыць дзецям сэнс свята, якое адзначаем 17 верасня, яго прамую ўзаемасувязь з дасягненнямі краіны, пра тое, што ляжыць у аснове беларускага адзінства і важнасці згоды і міру.

Сярод спікераў таксама былі першы сакратар Беларускага рэспубліканскага саюза моладзі Аляксандр Лук'янаў, палітычны аглядальнік, журналіст прэзідэнцкага пула Ігар Тур, старшыня праўлення рэспубліканскага дзяржаўна-грамадскага аб'яднання «Беларускае таварыства «Веды» Вадзім Гігін, старшыня Ліберальна-дэмакратычнай партыі Беларусі, дэпутат Палаты прадстаўнікоў Алег Гайдукевіч і не толькі.

Гучны акорд

Эстафету выступленняў ад спікераў прымалі вядомыя беларускія артысты. Адзін аднаго на сцэне змянялі розныя калектывы, выконваючы народныя песні і сучасныя кампазіцыі. Меладычныя падарункі публіцы «ўручылі» Вікторыя Алешка, вакальна-інструментальны ансамбль «Сябры», Юлія Быкава і Ганна Благава з сынамі і іншыя.

Арыгінальнае выкананне гімна стала яркім фіналам форуму. Галасы гледачоў і артыстаў гучалі ўнісон.

vitebsk-region.gov.by