Фотакарэспандэнт БЕЛТА Аляксандр Хітроў стаў лаўрэатам ганаровага звання "Чалавек года Віцебшчыны" за 2016 год, перадае карэспандэнт БЕЛТА з цырымоніі ўзнагароджання.
Урачыстае мерапрыемства ў гэтыя хвіліны праходзіць у канцэртнай зале "Віцебск", узнагароджвае лаўрэатаў старшыня Віцебскага аблвыканкама Мікалай Шарстнёў.
Аляксандр Хітроў працуе ў БЕЛТА з 1994 года, больш за 20 гадоў ён вядзе фоталетапіс жыцця рэгіёна, фіксуючы на камеру самыя яркія і значныя падзеі. Майстэрства і прафесіяналізм фотарэпарцёра адзначаны мноствам узнагарод, у тым ліку памятным прызам дырэкцыі Міжнароднага фестывалю мастацтваў "Славянскі базар у Віцебску". Аляксандр Хітроў у ліку пераможцаў Нацыянальнага конкурсу друкаваных СМІ "Залатая Літара" і рэспубліканскага конкурсу "Залатое пяро", а таксама абласнога конкурсу сродкаў масавай інфармацыі на прэмію імя Ф.Скарыны. Персанальныя выстаўкі фотакарэспандэнта праходзілі на Дзень пісьменства ў Глыбокім і фестывалі "Славянскі базар у Віцебску". За значны ўклад у рэалізацыю сацыяльнай палітыкі Беларусі, добрасумленную працу ў галіне журналістыкі фотакарэспандэнт БЕЛТА узнагароджаны Ганаровай граматай Нацыянальнага сходу.
Лаўрэатамі ганаровага звання "Чалавек года Віцебшчыны" штогод (пачынаючы з 2009 года) становяцца 100 жыхароў рэгіёна, якія прадстаўляюць розныя галіны народнай гаспадаркі: прамысловасць, аграпрамысловы комплекс, ахову здароўя, адукацыю, жыллёва-камунальную гаспадарку, сферу паслуг, культуру, сілавыя ведамствы, малы і сярэдні бізнес, энергетыку, фізкультуру і спорт і г.д.
Лепшыя людзі рэгіёна атрымліваюць дыпломы лаўрэатаў і грашовую прэмію. Акрамя таго, па традыцыі білборды з іх фотаздымкамі на працягу ўсяго года будуць упрыгожваць населеныя пункты вобласці.