24 студзеня, Віцебск /Дзіяна Курыло - БЕЛТА/. Наваполацкі ўчастковы, рызыкуючы жыццём, выратаваў жанчыну ад хатняга дэбашыра, распавёў карэспандэнту БЕЛТА начальнік аддзялення інфармацыі і грамадскіх сувязяў УУС Віцебскага аблвыканкама Андрэй Семенихін. Здарэнне, якое ледзь не скончылася трагедыяй, пачалося са званка ў дзяжурную частку Наваполацкага гараддзела міліцыі. Жанчына, якая тэлефанавала, паведаміла аб тым, што яе збіў былы муж, які пражывае з ёй у адной кватэры. На месца сямейнага скандалу выехалі ўчастковыя - капітан Іван Галяковіч і шараговец Вадзім Марковіч. Да гэтага часу сварка, здавалася, сціхла, і міліцыянеры прыступілі да выканання працэсуальных дзеянняў: шараговец апытваў суседзяў, а капітан Галяковіч прымаў заяву ад пацярпелай. У гэты момант з калідора кватэры з паляўнічай стрэльбай выскачыў п'яны дэбашыр і стрэліў у жанчыну, куля трапіла ёй у нагу. Іван Галяковіч кінуўся напярэрэз страляючаму, спрабуючы выхапіць у яго стрэльбу, і другі стрэл, які таксама прызначаўся былой жонцы, пайшоў у падлогу. Міліцыянер выклікаў хуткую дапамогу, далажыў аб тым, што адбылося ў аддзел і стаў аказваць першую дамедыцынскую дапамогу пацярпелай. У дачыненні да 54-гадовага дэбашыра Наваполацкім гараддзелам Следчага камітэта ўзбуджана крымінальная справа па артыкуле 186 КК Беларусі "Пагроза забойствам, прычыненнем цяжкіх цялесных пашкоджанняў або знішчэннем маёмасці", якая прадугледжвае пакаранне ў выглядзе штрафу або выпраўленчых работ на тэрмін да аднаго года або арыштам на тэрмін да шасці месяцаў. Грамадзянін затрыманы. Як высветлілася, стрэльба, з якой былі зроблены стрэлы, не зарэгістравана, і аб тым, што ў доме захоўваецца зброя, ніхто з дамачадцаў не ведаў. За асабістую мужнасць, адвагу і самаадданасць, праяўленыя пры ахове жыцця і здароўя людзей, звязаныя з рызыкай для жыцця, кіраўніцтва УУС Віцебскага аблвыканкама мае намер хадайнічаць перад Міністэрствам унутраных спраў аб узнагароджанні капітана Івана Галяковіча. -0-

БЕЛТА