Наваполацкіх педагогаў будуць вучыць асновам інклюзіўнай адукацыі па праекце ЕС "Наваполацк - ад інклюзіўнай школы да інклюзіўнага горада", паведамілі карэспандэнту БЕЛТА ў Наваполацкім гарвыканкаме.
Гэты праект гарвыканкам рэалізуе пры фінансавай падтрымцы Еўрапейскага саюза з 1 лістапада 2016 года. Адной з агульных мэт праекта з'яўляецца ідэя забеспячэння роўных магчымасцей атрымання адукацыі для дзяцей і моладзі ў адпаведнасці з іх патрэбамі і індывідуальнымі магчымасцямі, грунтуючыся на прынцыпах інклюзіі. Семінар для педагогаў устаноў адукацыі Наваполацка стане адным з мерапрыемстваў праекта.
"Першы крок у дасягненні мэты - павысіць кампетэнтнасць і ўзровень прафесіяналізму прадстаўнікоў мясцовай улады, кіраўнікоў і педагогаў устаноў адукацыі горада, бацькоў, а таксама студэнтаў і прафесарска-выкладчыцкага складу Полацкага дзяржуніверсітэта. Для гэтага запланаваны шэраг навучальных семінараў і трэнінгаў для розных мэтавых груп. Першы семінар правядуць 7-10 лютага на базе сярэдняй школы №8, дзе 20 педагогаў горада пройдуць навучанне па асноўных пытаннях інклюзіі пад кіраўніцтвам вопытных трэнераў", - адзначыла намеснік дырэктара СШ №8 Таццяна Парадня.
Падчас семінара педагогі набудуць наступныя кампетэнцыі: веданне і разуменне каштоўнасных арыенціраў інклюзіўнай адукацыі (галоўныя перавагі), валоданне паняційным слоўнікам па тэме, разуменне базавых прынцыпаў інклюзіўнай адукацыі, разуменне адрозненняў інтэграванай і інклюзіўнай адукацыі. Чакаецца, што гэта паўплывае ў цэлым на сацыяльнае асяроддзе па паляпшэнні кодэкса паводзін жыхароў Наваполацка ў плане мабільнасці і цярпімасці ў адносінах да людзей з абмежаванымі магчымасцямі. Раней нафтаград далучыўся да глабальнай ініцыятывы ЮНІСЕФ, нацэленай на абарону правоў дзяцей і стварэнне ўмоў для іх усебаковага развіцця, атрымаў ганаровае званне "Горад, дружалюбны дзецям". Новы праект знешняга садзейнічання ЕС разлічаны на тры гады і з'яўляецца лагічным працягам шэрагу гарадскіх ініцыятыў. Увасобіць усё запланаванае па праекце ў жыццё дапамогуць грамадскія аб'яднанні "Беларускі саюз транспартнікаў" і "Беларускае таварыства інвалідаў". Пры гарвыканкаме створана міжведамасная камісія па развіцці інклюзіўнага асяроддзя, а таксама рабочая група, у якую ўвайшлі ўсе ахвотныя.