Новы від птушак заўважаны ў Беларусі — кучаравы пелікан

Новы від птушак – кучаравы пелікан – адзначаны ў Беларусі, паведамілі БЕЛТА ў грамадскай арганізацыі "Ахова птушак Бацькаўшчыны" (АПБ).

"У Беларусі адкрыты новы для нашай краіны від птушак – кучаравы пелікан. Рыбак Аляксандр Розін размясціў у Facebook фотаздымак птушкі, які зрабіў 10 студзеня каля Чыгірынскага вадасховішча на межах Кіраўскага і Быхаўскага раёнаў Магілёўскай вобласці падчас спаборніцтваў па лоўлі на мармышку. Як распавядае Аляксандр, у той дзень птушку бачылі больш за 40 чалавек, удзельнікаў спаборніцтваў. Ніхто не падазраваў, што перад імі – новы для Беларусі від птушак. Важнасць моманту крыху пазней ацанілі знаўцы не рыб, а птушак. Арнітолагі разгледзелі на фота адкрыццё: на ім быў кучаравы пелікан, новая для краіны птушка", – растлумачылі ў АПБ.

У АПБ распавялі, што 12 студзеня, на наступны дзень пасля з'яўлення фотаздымка, які ўзбударажыў бердвотчараў, група арнітолагаў АПБ і НАН Беларусі адправілася на пошукі пелікана. "Нягледзячы на надвор'е, арнітолагі знайшлі птушку і пацвердзілі: дарослая асобіна кучаравага пелікана плавае на вызваленым ад лёду ўчастку ракі Друць ніжэй Чыгірынскага вадасховішча. Пелікан і плаваў, і адпачываў на беразе. Сустрэча з пеліканам прыйшлася на разгар цыклону "Даніэла": ішоў то дождж, то снег. Пелікан стойка пераносіў цяжкасці беларускай зімы, ніякай аслабленасці ў птушкі арнітолагі не заўважылі", – распавялі спецыялісты.

"Дзе птушка была да лёсавызначальнай фотасесіі, адназначна сказаць нельга. Часам падчас міграцыі птушкі выбіраюць няправільны кірунак. Магчыма, кучаравы пелікан зімаваў у суседняй краіне і нядаўна вырашыў змяніць прапіску. Паводле апавяданняў рыбакоў, за дзень да фота адкрытай вады на Чыгірынцы не было", – адзначае дырэктар АПБ Аляксандр Вінчэўскі і супакойвае ўсіх, хто перажывае за кучаравага прыгажуна ў суровай беларускай зіме. Па сведчанні грузінскіх арнітолагаў, пеліканы на Каўказе застаюцца ў месцах гнездавання нават пры тэмпературы мінус 15 градусаў. І якраз кучаравыя з'яўляюцца асабліва марозаўстойлівымі.

У АПБ патлумачылі, што ў 2015 годзе кучаравыя пеліканы былі адзначаны ў сакавіку ў Германіі, у сакавіку і жніўні - у Польшчы, у маі і ліпені - у Літве. Гэта краіны, дзе дадзены від, як і ў нас, з'яўляецца заляцелым і сустракаецца вельмі рэдка, часцей за ўсё выпадкова. У Еўропе гняздуюцца два віды пеліканаў, а кучаравага ў Беларусі не бачылі ні разу за амаль 150 гадоў развіцця арніталогіі.

Пакуль у спісе птушак Беларусі 325 відаў. Пасля пасяджэння БАФК (Беларускай арнітафаўністычнай камісіі) спіс папоўніць кучаравы пелікан. Перад гэтым новы для Беларусі від птушак - птушку-зарнічку - адкрыў у верасні 2014 года арнітолаг Дзяніс Кіцель.

Грамадская арганізацыя "Ахова птушак Бацькаўшчыны" - найбуйнейшая недзяржаўная прыродаахоўная арганізацыя Беларусі і нацыянальны партнёр найбуйнейшай міжнароднай сеткі прыродаахоўных арганізацый BirdLifeInternational. АПБ - гэта больш за 3500 членаў і прыхільнікаў, каля 120 школьных клубаў і 14 аддзяленняў па ўсёй краіне.

Навіны Беларусі (БЕЛТА)