Новы закон аб зваротах грамадзян сістэматызуе заканадаўства ў гэтай сферы
23.1.20120 праглядаў
23 студзеня, Віцебск /Вольга Багачова - БЕЛТА/. Закон "Аб зваротах грамадзян і юрыдычных асоб", які ўступіў у сілу ў Беларусі 22 студзеня, сістэматызуе заканадаўства ў гэтай важнай сферы. Такое меркаванне выказаў карэспандэнту БЕЛТА начальнік арганізацыйна-кантрольнага аддзела пракуратуры Віцебскай вобласці, старшы саветнік юстыцыі Ігар Багачоў.
"Фактычна новым дакументам рэгламентуецца парадак рэалізацыі канстытуцыйнага права кожнага грамадзяніна на зварот у дзяржаўныя органы. Пры гэтым выкарыстанне гэтага права пашырана і прадастаўлена таксама індывідуальным прадпрымальнікам і юрыдычным асобам", - падкрэсліў Ігар Багачоў.
У законе вызначаны асноўныя тэрміны, правы і абавязкі заяўнікаў, абавязкі арганізацый пры разглядзе зваротаў, парадак падачы пісьмовых і вусных заяў, асаблівасці разгляду калектыўных, ананімных, паўторных, электронных і іншых зваротаў, парадак правядзення асабістага прыёму грамадзян і прадстаўнікоў юрыдычных асоб, а таксама іншыя пытанні. У параўнанні з законам аб зваротах грамадзян, які дзейнічаў раней, новы мае шэраг істотных новаўвядзенняў. У прыватнасці, вызначаны парадак складання і разгляду электронных зваротаў, якія паступаюць на адрасы электроннай пошты або размешчаны на афіцыйных сайтах арганізацый у сетцы Інтэрнэт. Электронныя звароты павінны будуць утрымліваць тыя ж звесткі, што і пісьмовыя, але замест асабістага подпісу варта ўказваць адрас электроннай пошты заяўніка. Адказы на такія звароты, а ў неабходных выпадках паведамленні аб падаўжэнні тэрміну іх вырашэння будуць накіроўвацца (за выключэннем некаторых выпадкаў) на адрас электроннай пошты заяўнікаў, пазначаны ў электронных зваротах. "З улікам развіцця інтэрнэт-тэхналогій, іх ролі ў жыцці грамадства, гэта важны падыход да арганізацыі работы са зваротамі грамадзян", - упэўнены суразмоўнік.
Кіраўнікі дзяржаўных органаў, іншых арганізацый цяпер маюць права прымяняць пры асабістым прыёме грамадзян, іх прадстаўнікоў, а таксама прадстаўнікоў юрыдычных асоб тэхнічныя сродкі, гэта значыць ажыццяўляць аўдыё- і відэазапіс, кіна- і фотаздымку. Аднак аб прымяненні такіх сродкаў заяўнік павінен быць праінфармаваны да пачатку асабістага прыёму. "Гэта дазволіць абараніць інтарэсы кожнага з бакоў у выпадку спрэчных сітуацый", - адзначыў Ігар Багачоў.
Новым законам устаноўлены больш дакладныя патрабаванні да пісьмовых адказаў на пісьмовыя звароты. Яны павінны быць абгрунтаванымі і матываванымі (пры неабходнасці са спасылкамі на нормы актаў заканадаўства), змяшчаць канкрэтныя фармулёўкі, якія абвяргаюць або пацвярджаюць довады заяўнікаў. Пісьмовыя адказы падпісваюцца кіраўніком арганізацыі, індывідуальным прадпрымальнікам або ўпаўнаважанымі або службовымі асобамі. Адпаведзі на пісьмовыя звароты выкладаюцца на мове звароту (рускай або беларускай). Тэрмін для разгляду пісьмовых зваротаў (у тым ліку запісаў у кнізе заўваг і прапаноў) устаноўлены не пазней 15 дзён, а калі патрабуецца дадатковае вывучэнне і праверка - не больш аднаго месяца, калі іншы тэрмін не ўстаноўлены заканадаўчымі актамі. У выпадку, калі для вырашэння выкладзеных у зваротах пытанняў неабходныя здзяйсненне пэўных дзеянняў (выкананне работ, аказанне паслуг), атрыманне інфармацыі з замежнай дзяржавы ў тэрміны, якія перавышаюць месячны тэрмін, заяўнікі ў пяцідзённы тэрмін з дня працягнення тэрміну разгляду зваротаў апавяшчаюцца аб прычынах перавышэння месячнага тэрміну і тэрмінах здзяйснення такіх дзеянняў або тэрмінах разгляду зваротаў па сутнасці.
"Такім чынам, у цэлым дакумент пашырае магчымасці звароту грамадзян і юрыдычных асоб у дзяржорганы, робіць уладу больш адкрытай і даступнай для людзей", - заключыў Ігар Багачоў.
У 2011 годзе ў органы пракуратуры Віцебскай вобласці паступіла амаль 9,4 тыс. зваротаў грамадзян (на 5,3% больш у параўнанні з 2010 годам), з якіх непасрэдна супрацоўнікамі пракуратуры вырашана 6,5 тыс. заяў. З ліку вырашаных зваротаў задаволена 598 заяў, або 9,2% (11,8%). Высокі працэнт задаволеных скаргаў адзначаецца ў Гарадоцкім, Лёзненскім, Дубровенскім, Шаркаўшчынскім, Пастаўскім раёнах. Больш за ўсё зваротаў вырашана па пытаннях следства або дазнання - 2980, або 45,8% ад агульнай колькасці вырашаных. Задаволена 234 названых звароты.Акрамя таго, пракурорамі разгледжаны 1509 заяў юрыдычных асоб. На асабістым прыёме супрацоўнікамі органаў пракуратуры прынята 6,2 тыс. чалавек. Таксама за мінулы год органамі пракуратуры праведзена 112 праверак выканання заканадаўства аб зваротах грамадзян, па выніках якіх кіраўнікам устаноў, прадпрыемстваў і арганізацый накіравана 88 прадстаўленняў і 17 прадпісанняў, у дачыненні да 29 службовых асоб вынесены афіцыйныя папярэджанні аб недапушчальнасці парушэнняў закона. Па патрабаваннях пракурораў да дысцыплінарнай, адміністрацыйнай і матэрыяльнай адказнасці прыцягнута 120 чалавек.-0-
БЕЛТА