За парты СШ № 46 ім. І. Баграмяна селі звыш 2 тыс. вучняў, каля 170 з якіх – першакласнікі. Ім пашанцавала асабліва: школа імкліва ўдасканальваецца, робячы працэс навучання яшчэ больш займальным і эфектыўным, у дзяцей з'яўляюцца новыя магчымасці раскрыць свой патэнцыял, увасобіць самыя смелыя праекты і ідэі. Адным з абнаўленняў да верасня стаў кабінет інфарматыкі і інжынерных тэхналогій, створаны пры падтрымцы ПА «Энергакомплект».
Цяпер тут ёсць усё для раскрыцця настолькі запатрабаваных сёння на рынку працы лічбавых і інжынерных кампетэнцый: 15 новых магутных камп'ютараў, ноўтбук, мультымедыйны праектар, прынтэр.
Першым, яшчэ да ўрачыстай лінейкі, камп'ютарную тэхніку пратэставаў 11 «А», дзе адкрыта група з профільным ухілам. У жыцці гэтых дзяцей інфарматыка і матэматыка займаюць асаблівае месца.
– Доўгачаканая падзея для адзінаццацікласнікаў, – каментуе будучы выпускнік Іван Дваранкін. – Думаю, само навучанне пойдзе хутчэй, будзе менш «лагаў», і праграмы будуць працаваць карэктна. Раней з гэтым бывалі праблемы. Перыядычна займаюся 3D-мадэляваннем, відэамантажом, а для гэтага патрабуецца даволі магутнае абсталяванне. Рабіць гэта дома ў мяне няма магчымасці, таму што ў самога не асабліва магутны камп'ютар. Цяпер змагу займацца ў школе.
З тэхнічным абнаўленнем кабінета ў Івана і яго аднакласнікаў будзе значна больш магчымасцей і перамог. Тут яны змогуць працаваць над інжынернымі праектамі, асвойваць графічны дызайн. Адзінаццацікласнік удзельнічае ў конкурсах па 3D-мадэляванні, робіць сацыяльныя відэаролікі, буктрэйлеры і заваёўвае прызавыя месцы на абласным і рэспубліканскім узроўнях. ВНУ і спецыяльнасць ужо прыгледзеў. Наступнай восенню бачыць сябе студэнтам БДУ, які вывучае камп'ютэрнае мадэляванне і распрацоўку вэб-дадаткаў. Прахадныя балы высокія, але паступіць на бюджэт «цалкам магчыма», асабліва з новымі тэхнічнымі магчымасцямі школы пры падрыхтоўцы, ацэньвае свае шанцы юнак.
– Абнаўленне кабінета інфарматыкі дае шмат магчымасцей для нашага агульнага развіцця – гэта дапамагае ў вучобе, – дзеліцца адзінаццацікласніца Анастасія Беляева. – Паколькі я філолаг, мне тэхніка патрэбна для прагляду навучальных ролікаў і пошуку інфармацыі.
Магутныя камп’ютары і іншае абсталяванне ў гэтым класе закуплены за кошт спонсарскіх сродкаў. ПА «Энергакамплект» перадало ўстанове падарачны сертыфікат на 30 тыс. рублёў. Вясной школа падпісала дагавор аб супрацоўніцтве з прадпрыемствам у рамках работы інжынернай групы дзесяцікласнікаў з вывучэннем на павышаным узроўні матэматыкі і інфарматыкі.
З высокімі тэхналогіямі вытворчае аб’яднанне мае справу кожны дзень – тут выпускаюць прадукцыю, якая высока цэніцца ў Беларусі і за мяжой. Вытворчасць «Энергакамплекта» – сучаснае абсталяванне, складаныя тэхналагічныя працэсы і высокія патрабаванні да кадраў.
– За кожным нашым поспехам стаяць людзі – інжынеры, тэхнолагі, праграмісты, рабочыя. Менавіта іх ідэі і веды ператвараюць метал у кабель, у рашэнні, якія рухаюць наперад энергетыку, прамысловасць, транспарт. Сёння мы не толькі інвестуем у развіццё вытворчасці, але і робім крок насустрач будучым інжынерам. За гэтымі камп’ютарамі навучэнцы змогуць ствараць 3D-мадэлі, прыдумляць, праектаваць, ужо ў школе адчуць сябе сапраўднымі прафесіяналамі, – падкрэсліла намеснік генеральнага дырэктара па персанале ПА «Энергакамплект» Алеся Іванова.
Яна заклікала рабят не адкладаць мары, не баяцца цяжкасцей, спрабаваць новае і дадала: на прадпрыемстве заўсёды чакаюць таленавітых і захопленых людзей. Алеся Іванова перадала школе ад прадпрыемства кнігу «Наш Прэзідэнт».
Дырэктар школы Валянціна Шамшура назвала падарунак прадпрыемства – абноўлены інжынерны клас – прыкладам ідэальнага ўзаемадзеяння бізнесу і адукацыі.
– За 15 гадоў працы школы зроблена вельмі многае. З кожным годам расце творчы патэнцыял, адукацыйны ўзровень нашых навучэнцаў, з’яўляюцца новыя дасягненні. У мінулым годзе два вучні сталі пераможцамі рэспубліканскай алімпіяды, мы выпусцілі 11 медалістаў, плануем павялічыць іх колькасць, – адзначыла Валянціна Шамшура. – Прыемна, што кіраўніцтва вытворчага аб’яднання, старшыня Савета дырэктараў Сяргей Падгайскі, не толькі займаецца развіццём свайго прадпрыемства, але і ўкладвае ў моладзь. Падтрымлівае іх і стварае ўсе ўмовы для рэалізацыі іх мэт і развіцця талентаў.
Новы кабінет у Дзень ведаў адкрылі перад урачыстай лінейкай. Першы званок прагучаў не толькі да ўрокаў, але і да новых перспектыў.