У Віцебску ўрачыста пусцілі рух па новым мосце

У Віцебску адбылася цырымонія святочнага пуску руху па пуцеправодзе "Полацкі" пасля маштабнай рэканструкцыі.

Паводле першапачатковых планаў, будаўнічыя работы павінны былі заняць амаль пяць гадоў. Аднак спецыялісты, працуючы ўначы і ў незвычайна цёплую зіму, справіліся за 20 месяцаў. Для жыхароў гэтай часткі Віцебска развязка вельмі неабходная. Па мосце ў розныя раёны горада будуць ездзіць трамваі, тралейбусы, аўтобусы і маршруткі.

Перад пускам руху адбылося ўзнагароджанне тых, хто быў прычынны да рэканструкцыі пуцеправода. Старшыня Віцебскага аблвыканкама Мікалай Шэрстнёў падзякаваў службам і арганізацыям за будаўніцтва і добраўпарадкаванне развязкі. "Сёння знамянальны дзень, адкрываем такі важны аб'ект. У тое, што так хутка рэканструявалі мост, не могуць паверыць не толькі скептыкі, але і прафесіяналы ў гэтай сферы", - адзначыў губернатар.

Мікалай Шэрстнёў распавёў пра планы развіцця дарожнай інфраструктуры ў будучыні. Паводле яго слоў, за год - да наступнага "Славянскага базару" - маюць намер прывесці ў парадак вуліцу Гагарына ў Віцебску. Потым завяршыць будаўніцтва кальцавой дарогі вакол абласнога цэнтра.

Пасля ўшанавання спецыялістаў пуцеправод пакінула будаўнічая тэхніка, якая працавала на аб'екце і рыхтавала яго да здачы. У канцы ўрачыстасці жадаючыя змаглі першымі праехацца на грамадскім транспарце па мосце.

Пуцеправод "Полацкі" быў пабудаваны яшчэ ў канцы XIX стагоддзя, гэта адна з найважнейшых транспартных артэрый Віцебска. Ён размешчаны ў месцы зліцця вуліц Касманаўтаў, Цітова і Ленінградскай і не толькі злучае розныя раёны горада, але і з'яўляецца працягам рэспубліканскіх дарог, якія вядуць на Полацк і далей - у Расію і Латвію.

У апошні раз шляхаправод рэканструявалі ў 1958 годзе. З часам яго канструкцыі пачалі разбурацца, у чэрвені 2011 года тут пачаліся будаўніча-мантажныя работы. З-за адсутнасці фінансавання ў 2015 годзе іх давялося спыніць. Праз тры гады мост зноў абследавалі і прыйшлі да высновы, што ён знаходзіцца ў аварыйным стане. У лістападзе 2018 года рух транспарту і пешаходаў па шляхаправодзе спыніўся. Улічваючы нязручнасці, звязаныя з закрыццём руху (тут праходзілі 4 трамвайныя і 15 аўтобусных маршрутаў, штодзённа курсіравалі 110 маршрутак), работы на аб'екце былі арганізаваны ў дзве змены, у іх былі задзейнічаны 400 будаўнікоў і больш за 70 адзінак тэхнікі.

Будаўнічыя работы абышліся ў Br89 млн, у тым ліку крэдытныя рэсурсы. Аббноўлены шляхаправод уяўляе сабой маставую канструкцыю шырынёй 45 м, вышынёй 7,6 м і працягласцю 412 м. Трамвайныя шляхі тут былі абсталяваны нестандартным метадам - з прымяненнем бесшпальнай канструкцыі па тэхналогіі ўклейвання рэексаў у металічных скрынках у зборна-маналітныя ўчасткі жалезабетоннай канструкцыі трамвайнага палатна. Пры гэтым рэйкі ўкладзены на гумовыя пракладкі тэмпературна-неразрэзнымі пуцямі, што памяншае колькасць стыкаў і зніжае шум і вібрацыі ад руху саставу.