На Віцебшчыне на час пасяўной кампаніі ў дапамогу аграрыям дадаткова прыцягнута 1,5 тыс. чалавек. Пра гэта паведаміў сёння, адказваючы на пытанне карэспандэнта БЕЛТА, старшыня Віцебскага аблвыканкама Мікалай Шарстнёў падчас рабочай паездкі ў Аршанскі раён па пытаннях правядзення сяўбы.
"Усе арганізацыйныя пытанні па кадравым складзе вырашаны. Мы прыцягнулі з гарадоў дадаткова каля 1 тыс. чалавек, у асноўным механізатараў, і каля 500 чалавек задзейнічалі з навучальных устаноў. Гэта хлопцы, якія маюць пасведчанне кіроўцы і здольныя кіраваць тэхнікай, і першакурснікі, задзейнічаныя на падсобных работах. Яны ўсе ўжо на месцах і ў рабоце", - падкрэсліў Мікалай Шарстнёў.
Старшыня аблвыканкама адзначыў, што ў гэтым годзе ўсе раёны Віцебскай вобласці ўступілі ў пасяўную практычна адначасова, шмат у чым гэтаму спрыяла надвор'е. Па стане на 5 красавіка, засеяна ўжо 11% плошчаў. Выконваецца поўны комплекс работ. Для атрымання максімальнай аддачы восенню зараз ключавым фактарам з'яўляецца строгае захаванне тэхналогіі. "Калі мы яе вытрымаем, то атрымаем максімум ураджаю. Я пра гэта ўжо казаў: 30 ц/га, якія мы атрымліваем, і 70-80 ц/га, якія павінны атрымліваць, - гэта як раз розніца, якая залежыць ад тэхналогіі. Таму мы настройваем усіх на яе максімальнае захаванне і стараемся вырашаць усе звязаныя з гэтым пытанні", - падкрэсліў Мікалай Шарстнёў.
Аб ходзе пасяўной у Аршанскім раёне распавёў старшыня райвыканкама Ігар Ісачэнка. Зараз на палях усіх гаспадарак актыўна вядзецца сяўба яравых, успашка і бараніраванне глебы, падкормка азімых, падсейка шматгадовых траў, перасяў загінуўшых азімых пасеваў і іншыя першачарговыя работы. Тэмпы сяўбы стабільна нарошчваюцца, на 5 красавіка засеяна 17,4% плошчаў яравых культур. "З улікам забяспечанасці мінеральнымі ўгнаеннямі, насеннем, кадрамі, высокай гатоўнасцю тэхнікі мы ідзем дастаткова нядрэнна. Калі захаваецца надвор'е, то на працягу 10-12 дзён вясновую сяўбу мы скончым", - канстатаваў кіраўнік раёна.
У гэтым годзе ў структуры пасяўных плошчаў Віцебскай вобласці збожжавыя і зернебабовыя зоймуць 417,4 тыс. га, крыжакветныя - 110,8 тыс. га, лён - 15 тыс. га. Агульная пасяўная плошча ўсіх сельскагаспадарчых культур складзе 788,3 тыс. га. З улікам пасеяных азімых збожжавых і азімага рапсу, шматгадовых траў на ворнай зямлі неабходна будзе пасеяць вясной 400 тыс. га яравых культур.