14 верасня, Віцебск /Сяргей Кочатаў - БЕЛТА/. Экспарт ААТ "Даломіт" у студзені-жніўні павялічыўся больш чым у два разы ў параўнанні з аналагічным перыядам 2010 года і склаў каля $4,9 млн. Пра гэта сёння журналістам паведаміў дырэктар прадпрыемства Іван Бабак, перадае карэспандэнт БЕЛТА. Асноўнымі спажыўцамі прадукцыі прадпрыемства з'яўляюцца партнёры з Расіі, Украіны і Літвы. Усе чатыры віды прадукцыі, якая вырабляецца (даламітавая мука, шчэбень, мінеральны парашок і напаўняльнікі), займаюць прыкладна роўныя долі ў аб'ёме экспартных паставак. У цэлым па выніках 2011 года "Даломіт" плануе экспартаваць прадукцыі ў аб'ёме да $6,3 млн. Да канца бягучага года акцыянернае таварыства плануе інвеставаць у асноўны капітал не менш за Br15 млрд. уласных сродкаў, тады як у мінулыя гады аб'ём інвестыцый складаў не менш за Br10 млрд., з якіх больш за 50% былі сродкі галіновага інавацыйнага фонду. Сёння "Даломіту" неабходна вырашаць задачы па скарачэнні вытворчых выдаткаў, у тым ліку па зніжэнні энергаспажывання, а таксама дыверсіфікацыі вытворчасці і асваенні выпуску новых відаў высокатэхналагічнай прадукцыі. На гэта накіравана распрацаваная на прадпрыемстве праграма інавацыйнага развіцця да 2015 года. У перспектыўных планах прадпрыемства - выкананне маштабнага праекта па тэхнічным пераўзбраенні вытворчасці даламітавай мукі, якая ў структуры таварнай прадукцыі займае каля 60%. Ён прадугледжвае замену дзеючага абсталявання на дзве вертыкальныя ролікавыя млыны для асноўнага памолу даламітавага шчэбню ў муку. Укараненне інавацыйнай тэхналогіі, распрацаванай галіновым інстытутам НДІСМ, дазволіць прадпрыемству знізіць энергаспажыванне прыкладна на 60%, а таксама паменшыць спажыванне паліва амаль на 50%. Акрамя таго, праект прадугледжвае ўвод у эксплуатацыю кагенерацыйнай устаноўкі, якая прызвана забяспечыць гадавую выпрацоўку электраэнергіі ў аб'ёме амаль 100 млн. кВт.г для патрэб прадпрыемства. Прадпрыемства ўтворана ў 1931 годзе і спецыялізуецца на вытворчасці даламітавай мукі, даламітавага шчэбню, мінеральнага парашку для дарожнага будаўніцтва і даламітавага напаўняльніка, які выкарыстоўваецца ў вытворчасці будматэрыялаў. Сыравіннай базай для прадпрыемства з'яўляюцца радовішчы даламітаў паблізу Віцебска з разведанымі запасамі ў 739 млн.т. У 1995 годзе прадпрыемства пераўтворана ў адкрытае акцыянернае таварыства "Даломіт".-0-

БЕЛТА