У Віцебску сёння пройдзе абласное прафсаюзнае свята для дзяцей, паведамілі карэспандэнту БЕЛТА ў абласным прафсаюзным аб'яднанні.
Галоўная прафсаюзная дабрачынная ёлка адбудзецца ў Віцебскім абласным Палацы дзяцей і моладзі. На ранішнік запрошаны больш за 250 дзяцей. Гэта дзеці-сіраты, выхаванцы дзіцячых дамоў, дзеці, якія засталіся без апекі бацькоў і з абмежаванымі магчымасцямі, а таксама тыя, хто выхоўваецца ў шматдзетных і малазабяспечаных сем'ях. Свята будзе напоўнена навагоднімі сюрпрызамі, гульнямі і падарункамі. Навагодняе прадстаўленне, падрыхтаванае вядучымі дзіцячымі калектывамі палаца, пройдзе ў займальным інтэрактыўным узаемадзеянні казачных персанажаў з юнымі гледачамі.
Навагоднія святы - толькі частка вялікай дабрачыннай акцыі "Прафсаюзы - дзецям". Па традыцыі напярэдадні навагодніх і калядных святаў прафсаюзы актыўна ўдзельнічаюць у дабрачынных мерапрыемствах, накіраваных на ўразлівыя катэгорыі непаўналетніх. Прадстаўнікі прафсаюзных арганізацый усіх узроўняў ва ўсіх рэгіёнах краіны наведваюць дзіцячыя дамы, школы-інтэрнаты, дамы-інтэрнаты для дзяцей-інвалідаў, сацыяльныя прытулкі, дамы дзіцяці, сустракаюцца з выхаванцамі шэфскіх інтэрнатных устаноў. "Для нас гэта вельмі важны пласт работы, накіраваны перш за ўсё на тое, каб галоўнае зімовае свята апраўдала чаканні кожнага дзіцяці", - падкрэслілі ў прафсаюзнай арганізацыі.
У Віцебскай вобласці з моманту абвяшчэння ў 2002 годзе дабрачыннай акцыі "Прафсаюзы - дзецям" на абласной прафсаюзнай ёлцы ўжо пабывалі каля 4,5 тыс. дзяцей.
Арганізатары навагодняга мерапрыемства - Віцебскае абласное аб'яднанне прафсаюзаў, галіновыя прафсаюзы, пярвіныя прафсаюзныя арганізацыі прадпрыемстваў і арганізацый горада.-0-