У Сенне 22 сакавіка пройдзе пяты абласны свята-конкурс лялечных тэатраў і батлеек, паведамілі БЕЛТА ў Сенненскім райвыканкаме.
Штогадовая тэатральная падзея адбудзецца на сцэне раённага Цэнтра культуры і народнай творчасці. На працягу ўсяго дня будуць спаборнічаць у сцэнічным майстэрстве калектывы з 12 раёнаў Віцебскай вобласці агульнай колькасцю больш за 100 чалавек. На свяце яны пакажуць новыя пастаноўкі па вядомых народных казках. Уважлівымі і ўдзячнымі гледачамі традыцыйна стануць школьнікі і выхаванцы дзіцячых садоў райцэнтра і бліжэйшых населеных пунктаў.
Яшчэ адна добрая традыцыя свята - дабрачынная акцыя "Падарунак дзецям", падчас якой творчыя калектывы вобласці дораць падарункі для выхаванцаў Сенненскай школы-інтэрната для дзяцей, якія засталіся без апекі бацькоў.
Арганізатары мерапрыемства - упраўленне культуры Віцебскага аблвыканкама, Віцебскі абласны метадычны цэнтр народнай творчасці і Сенненскі райвыканкам.