21 ліпеня, Мінск /Кар. БЕЛТА/. Згодна з каляндарным планам па падрыхтоўцы і правядзенні выбараў дэпутатаў Палаты прадстаўнікоў Нацыянальнага сходу пятага склікання, утварэнне ўчасткаў для галасавання завершыцца ў Беларусі 21 ліпеня, паведамляе карэспандэнт БЕЛТА. Участкі для галасавання ўтвараюць раённыя, а ў абласных цэнтрах гарадскія выканкамы, мясцовыя адміністрацыі па ўзгадненні з адпаведнымі акруговымі выбарчымі камісіямі. Кіраўнікі дыпламатычных прадстаўніцтваў, консульскіх устаноў Беларусі ствараюць участкі за мяжой. Звесткі аб іх Міністэрства замежных спраў накіруе ў ЦВК не пазней 23 ліпеня. Колькасць выбаршчыкаў на ўчастках можа складаць ад 20 да 3 тыс. чалавек. Участковыя выбарчыя камісіі павінны быць створаны не пазней чым за 45 дзён да выбараў, гэта значыць яны будуць утвораны да 8 жніўня ўключна. У іх складзе можа быць 5-19 чалавек. Да 5 жніўня ўключна павінна завяршыцца вылучэнне кандыдатур ва ўчастковыя камісіі. Прапаноўваць сваіх прадстаўнікоў маюць права палітычныя партыі, іншыя грамадскія аб'яднанні, працоўныя калектывы, а таксама грамадзяне Беларусі шляхам падачы заявы. Выбары дэпутатаў Палаты прадстаўнікоў Нацыянальнага сходу пятага склікання пройдуць 23 верасня.-0-

БЕЛТА