Адны з часта задаваных пытанняў, якія паступаюць у Лепельскую міжраённую інспекцыю аховы жывёльнага і расліннага свету, тычацца таго, дзе і ў які час можна лавіць ракаў, колькі ракаловак дазволена выкарыстоўваць?

Парадак і ўмовы здабычы рака даўгапалага (вузкапалага) вызначаны Правіламі здабычы, нарыхтоўкі і (або) закупкі дзікіх жывёл, якія не адносяцца да аб'ектаў палявання і рыбалоўства. Рак шыракапалы ўключаны ў Чырвоную кнігу Рэспублікі Беларусь і яго здабыча забаронена.

У асабістых мэтах грамадзяне могуць здабываць рака даўгапалага (вузкапалага) з дапамогай не больш чым трох ракаловак на кожнага лоўца, пакідаць іх без нагляду нельга. Дазволены таксама лоў ракаў рукамі, але толькі ў светлы час сутак. Пры здабычы ракаў нельга выкарыстоўваць акваланг.

За суткі аднаму чалавеку дазваляецца вылавіць не больш за 2 кг ракаў. Варта выконваць прамысловую меру: адлегласць ад вострага канца раструма да канца тэльсона у здабытых ракаў павінна складаць не менш за 10,5 см.

Тэрміны забароны на вылаў рака дыферэнцыраваны па рэгіёнах. Забараняецца лоў рака даўгапалага (вузкапалага) у рыбалоўных угоддзях Брэсцкай і Гомельскай абласцей з 20 сакавіка па 18 мая, Гродзенскай, Мінскай і Магілёўскай абласцей – з 1 красавіка па 30 мая, Віцебскай вобласці – з 10 красавіка па 8 чэрвеня. Здабываць яйцаносных самак і самак з лічынкамі забаронена на працягу ўсяго года.

Ракалоўка – прыстасаванне для здабычы ракаў, якое ўяўляе сабой сеткаваты квадрат (круг) з дыяганаллю (дыяметрам) не больш за 100 сантыметраў з замацаванай у цэнтры прынадай (пад'ёмнік адкрытага тыпу) або пастку (даўжынёй не больш за 100 см) з адным або некалькімі (не больш за 5) уваходамі з дыяметрам уваходнага адтуліны не больш за 70 сантыметраў (закрытага тыпу).