Урачэбная амбулаторыя для абслугоўвання дзіцячага насельніцтва, а таксама жаночая кансультацыя адкрыюцца ў мікрараёне Білева ў Віцебску да лета, паведаміў карэспандэнту БЕЛТА начальнік упраўлення аховы здароўя аблвыканкама Юрый Дзеркач.
Урачэбная амбулаторыя для абслугоўвання дзіцячага насельніцтва, а таксама жаночая кансультацыя адкрыюцца ў мікрараёне Білева ў Віцебску да лета, паведаміў карэспандэнту БЕЛТА начальнік упраўлення аховы здароўя аблвыканкама Юрый Дзеркач.
У буйным мікрараёне, які будуецца, у канцы снежня 2016 года з'явіўся першы аб'ект аховы здароўя - урачэбная амбулаторыя для дарослага насельніцтва. На адкрыцці было анансавана і стварэнне своеасаблівага офіса дзіцячых урачоў у Білева. "Цяпер ужо вядуцца будаўнічыя работы. Акрамя педыятрычнага аддзялення мы адкрыем яшчэ і жаночую кансультацыю. Абодва гэтыя аб'екты размесцяцца на першым паверсе аднаго з жылых дамоў, што будуюцца. Выкупім 4 кватэры за кошт сродкаў, якія выдзяляюцца на фінансаванне медыцынскіх мерапрыемстваў на аднаго жыхара і зэканомленых намі з дапамогай праведзенай аптымізацыі. Шмат што будзе залежаць ад тэрмінаў уводу самога дома, але да лета мы разлічваем, што аб'екты будуць адкрыты", - адзначыў Юрый Дзеркач.
Цяпер у Білева пражываюць каля 9 тыс. дзяцей, і плошчаў будучага офіса будзе больш чым дастаткова для абслугоўвання такой колькасці маленькіх пацыентаў. Жаночая кансультацыя ў перспектыве зможа ахапіць паслугамі каля 18 тыс. чалавек (цяпер усё дарослае насельніцтва мікрараёна складае каля 20 тыс.). Юрый Дзеркач падкрэсліў, што абодва аб'екты набліжаюць першасную медыцынскую дапамогу непасрэдна да насельніцтва. Але разам з тым гэта часовая мера. "У больш аддаленай перспектыве неабходнасць у такіх офісах у Білева адпадзе - тады гэтыя памяшканні можна будзе зноў увесці ў жылы фонд і прадаставіць службовыя кватэры для медыкаў. Калі насельніцтва мікрараёна дасягне 50 тыс., мы ўжо пабудуем тут шматпрофільны паліклінічны комплекс. Нядаўна было прынята рашэнне аб накіраванні бязваротнай кітайскай пазыкі менавіта на ўзвядзенне гэтага аб'екта з нуля. Акрамя таго, ёсць рэзалюцыі аб выдзяленні сродкаў на завяршэнне будаўніцтва паліклінікі ў мікрараёне Юг-7. Так што ўжо хутка гэтая ўстанова будзе ўведзена, і мы зможам пераразмеркаваць нагрузкі на дзеючыя паліклінікі", - дадаў Юрый Дзеркач.