21 красавіка, Віцебск /Дыяна Курыло - БЕЛТА/. Прэтэндэнтак на тытул "Каралева фітнесу Беларусі" выберуць сёння ў Віцебскай вобласці, паведаміла карэспандэнту БЕЛТА начальнік аддзела вучэбна-метадычнага цэнтра ўпраўлення фізічнай культуры, спорту і турызму Віцебскага аблвыканкама Галіна Каплунова. Цэнтральны спартыўны комплекс "Віцебск" збярэ амаль 300 аматараў актыўнага адпачынку з розных раёнаў Віцебскай вобласці. Для іх будуць арганізаваны майстар-клас лепшых фітнес-трэнераў Беларусі. Для малышоў ад 7 да 10 гадоў будзе арганізаваны адкрыты ўрок фітнесу, а для старэйшых дзяцей - фітнес-канвенцыя "Запальвай". Як падкрэсліла Галіна Каплунова, усе гэтыя мерапрыемствы будуць накіраваны на прапаганду здаровага ладу жыцця сярод дзяцей і падлеткаў, а таксама на павышэнне прафесійнага ўзроўню трэнераў. Кульмінацыяй фізкультурна-спартыўнага фестывалю стане адборачны рэгіянальны тур рэспубліканскага конкурсу "Каралева фітнесу Беларусі". Каля 80 удзельніц ва ўзросце ад 21 года да 40 гадоў з Віцебска, Оршы, Полацка, Наваполацка, Чашніцкага раёна вырашылі прэтэндаваць на гэты тытул. З іх прафесійнае журы выбярэ 10 лепшых, якія будуць прадстаўляць Віцебскую вобласць у фінале конкурсу ў Мінску 24-26 мая. Па словах Галіны Каплуновай, для пераможцаў адборачнага тура арганізатары падрыхтавалі каштоўныя прызы, якія спатрэбяцца ім для актыўнага адпачынку.-0-

БЕЛТА