21 сакавіка, Віцебск /Дзіяна Курыло - БЕЛТА/. Каля Br500 млн. накіравалі прадпрыемствы Віцебскай вобласці ў 2011 годзе на правядзенне лакальнага маніторынгу за скідамі сцёкавых вод і падземнымі водамі, паведамілі карэспандэнту БЕЛТА ў Віцебскім абласным камітэце прыродных рэсурсаў і аховы навакольнага асяроддзя. У цяперашні час з 77 прыродакарыстальнікаў, якія праводзяць лакальны маніторынг, 41 прадпрыемства назірае за скідамі сцёкавых вод у паверхневыя водныя аб'екты на 63 пунктах назірання, 50 прадпрыемстваў - за падземнымі водамі ў месцах размяшчэння аб'ектаў шкоднага ўздзеяння на 56 пунктах назірання. Усе гэтыя назіранні праводзяцца за кошт уласных сродкаў прадпрыемстваў. Лакальны маніторынг навакольнага асяроддзя з'яўляецца адным са складнікаў Нацыянальнай сістэмы маніторынгу навакольнага асяроддзя і праводзіцца непасрэдна прыродакарыстальнікамі, чыя дзейнасць аказвае ўплыў на навакольнае асяроддзе. Тут самі прадпрыемствы праводзяць назіранні за якасцю сцёкавых вод, што адводзяцца ў водныя аб'екты, за паверхневымі водамі ў раёне размяшчэння крыніц скідаў сцёкавых вод, а таксама за падземнымі водамі ў раёнах размяшчэння палігонаў прамысловых адходаў, палёў арашэння буйных жывёлагадоўчых комплексаў, палёў фільтрацыі і глеятлушчавых пляцовак камунальных ачышчальных збудаванняў. Фактычнае водаспажыванне Віцебскай вобласці складае 203 млн.куб м у год. Амаль 49% вады, што забіраецца з паверхневых і падземных крыніц, выкарыстоўваецца на вытворчыя патрэбы, крыху больш за 30% ідзе на гаспадарча-пітныя патрэбы, на вядзенне рыбаводнай гаспадаркі сыходзіць 10,4%, для сельскагаспадарчага водазабеспячэння адводзіцца 8,7% вады, што забіраецца, на арашэнне - 0,1%. Значнымі спажыўцамі водных рэсурсаў Віцебскай вобласці з'яўляюцца прадпрыемствы жыллёва-камунальнай гаспадаркі, водаспажыванне якіх у сярэднім складае 40% ад агульнага забору вады. У вобласці функцыянуе 240 збудаванняў па ачыстцы сцёкавых вод, з іх 127 ачышчаныя воды скідаюць у водныя аб'екты. У паверхневыя водныя аб'екты штогод скідаецца 120 млн.куб.м сцёкавых вод, у тым ліку 1,2 млн.куб.м недастаткова ачышчаных сцёкавых вод.