2 снежня, Віцебск /Дзіяна Курыло – БЕЛТА/. Каля паўмільярда долараў зарабіла будаўнічая індустрыя Беларусі на экспарце будматэрыялаў. Пра гэта, адказваючы на пытанне карэспандэнта БЕЛТА, паведаміў сёння міністр архітэктуры і будаўніцтва Беларусі Анатоль Нічкасаў падчас наведвання новых цэхаў ААТ "Віцебскдрэў". Прадпрыемствы будаўнічай індустрыі экспартавалі ў бягучым годзе прадукцыі 144-145% ад запланаванага аб'ёму. Агульны аб'ём экспартных паставак ацэньваецца прыкладна ў $500 млн., сказаў міністр. Гаворачы аб буйных праектах, рэалізаваных у бягучым годзе, Анатоль Нічкасаў нагадаў, што запушчана пятая тэхналагічная лінія на РУП "Граніт" па вытворчасці 3 млн. т шчэбню ў год. Другі месяц прадпрыемства працуе на праектнай магутнасці. Запушчаны ў эксплуатацыю два цэментныя заводы магутнасцю 1,8 млн. т кожны. Да канца года ў Крычаве пры ўдзеле кітайскага інвестара плануецца ўвесці ў строй яшчэ адзін цэментны завод. Новыя магутнасці па вытворчасці керамічных пліт для аздобкі фасадаў запушчаны на ААТ "Керамін". Падходзіць да завяршэння мадэрнізацыя заводаў буйнапанэльнага домабудавання. Уся гэтая прадукцыя запатрабавана за мяжой, як і паслугі беларускіх будаўнікоў, падкрэсліў міністр. На яго думку, перспектыўным для Беларусі можа аказацца экспарт паслуг па арганізацыі работ з беларускіх будматэрыялаў. "Магчыма арганізаваць працу інжынераў, прадаставіўшы тэхналогіі і экспартуючы прадукцыю домабудавання. Мы ў стане гэта зрабіць, і мы гэта апрабуем", - дадаў ён. Разам з тым, каб канкурыраваць на рынках, неабходна зніжаць затраты, эканоміць рэсурсы, што дазволіць знізіць сабекошт прадукцыі, лічыць міністр.-0-

БЕЛТА