Для педагагічнага калектыву Віцебскай вобласці першы рэпетыцыйны цэнтралізаваны экзамен прайшоў з хваляваннем, але ў штатным рэжыме, паведаміла першы намеснік начальніка галоўнага ўпраўлення па адукацыі Віцебскага аблвыканкама Алена Багдановіч.
Паводле яе слоў, усе 22 пункты ў рэгіёне адкрыліся па раскладзе. Загадзя і без лішняй спешкі настаўнікі арганізавалі прыбыццё да іх школьнікаў. Усяго ў спісах на сённяшні дзень значылася 5 тысяч 291 дзіця за мінусам вучняў, якія захварэлі, знаходзяцца ў дзіцячым Тэхнапарку і навучэнцаў на даму:
- Цяпер мы збіраем поўную інфармацыю з усіх рэгіёнаў вобласці. Па першапачатковых даных, можна казаць пра тое, што працэс прайшоў у штатным рэжыме. Усіх дзяцей на пункты прапусцілі, яны знайшлі свае аўдыторыі. Арганізатары, замацаваныя за кожнай аўдыторыяй, адпрацавалі добра. Усюды дзяжурылі медыкі. Зразумела, што для большасці з пунктаў, якія адкрыліся сёння, знаёмства з механізмам арганізацыі падобных мерапрыемстваў было ўпершыню. Зразумела, што ўсе хвалююцца. Аднак маніторынг сітуацыі, які праводзіўся на працягу ўсяго дня, паказаў, што ўсё прайшло ў спакойным працоўным рэжыме. Якія дробныя недахопы выяўлены, дэталі, якія патрабуюць дапрацоўкі, пакуль сказаць не магу. Дэталёва ўсе пытанні будзем абмяркоўваць 2 лютага пасля абагульнення інфармацыі.
Алена Багдановіч таксама адзначыла, што значная ўвага была нададзена дастаўцы да пунктаў прызначэння 1 тыс. 277 сельскіх школьнікаў. З гэтай мэтай задзейнічалі 99 школьных аўтобусаў. У Віцебску, Оршы, Полацку і Наваполацку для гарадскіх школьнікаў, установы адукацыі якіх размешчаны далей за 500 метраў ад пунктаў ЦЭ, скарэкціравалі графік руху грамадскага транспарту.
Прадуманай была арганізацыя харчавання навучэнцаў. Дзеці, якія прыбылі ў раённыя пункты ЦЭ, па завяршэнні экзаменаў атрымалі гарачае харчаванне. Па выніках дастаўкі дзяцей дадому таксама сабралі інфармацыю. Такім чынам, кожны элемент пробнага цэнтралізаванага экзамену быў прадуманы і адсочаны. Усё прайшло арганізавана і без парушэнняў, заключыла Алена Багдановіч.
Крыніца: vitebsk-region.gov.by