Аршанскі хлебазавод у 2018 годзе ў 1,5 раза павялічыць выпуск подовых хлебаў, паведаміў карэспандэнту БЕЛТА галоўны інжынер прадпрыемства Альберт Турок.
Аршанскі хлебазавод у 2018 годзе ў 1,5 раза павялічыць выпуск подовых хлебаў, паведаміў карэспандэнту БЕЛТА галоўны інжынер прадпрыемства Альберт Турок.
З улікам павышанага попыту на гэты від прадукцыі на хлебазаводзе рэалізуецца буйны інвестпраект па ўстаноўцы новай аўтаматызаванай чэшскай лініі, на якой будуць выпускацца подовыя хлебы рознай вагі - ад 0,7 кг да 1 кг. Аб'ём укладанняў складзе больш Br2 млн уласных сродкаў. Абсталяванне магутнасцю 14 т прадукцыі ў суткі ўжо закуплена, яго пастаўка чакаецца ў канцы лютага. Лінія будзе размешчана на вольных плошчах у дзеючым цэху. На працягу сакавіка на ёй плануецца правесці пусканаладачныя работы, а ў другім квартале цалкам выйсці на праектныя магутнасці.
Плановая мадэрнізацыя прадпрыемства таксама прадугледжвае, што на працягу года частка інвестыцый будзе накіравана на абнаўленне асобных адзінак тэхналагічнага абсталявання на розных вытворчых участках.
За 2017 год прадпрыемства выпусціла таварнай прадукцыі на Br14,8 млн, або 106,1% да ўзроўню 2016 года. Рэнтабельнасць рэалізацыі - 10,6%. На экспарт у розныя рэгіёны Расійскай Федэрацыі адгружана прадукцыі на $146,1 тыс. (адпаведна 106,4%). Чысты прыбытак за мінулы перыяд склаў Br1 млн, сярэдняя заработная плата - Br757, інвестыцыі ў асноўны капітал - Br191 тыс.
Аршанскі хлебазавод (філіял ААТ "Віцебскхлебпрам") заснаваны ў 1935 годзе. У цяперашні час у суткі выпускае 30 т хлебабулачных вырабаў (хлебы формавыя, заварныя, батоны, дробнаштучныя вырабы) і каля 700 кг кандытарскіх. Прадукцыя прадпрыемства, агульны асартымент якой налічвае каля 70 найменняў, адзначана шматлікімі ўзнагародамі. Сярод апошніх - залатыя медалі з 26-й міжнароднай аграпрамысловай выставы-кірмашу "Аграрусь 2017" (Санкт-Пецярбург) і міжнароднага чэмпіянату кандытарскага мастацтва, які праходзіў у рамках спецыялізаванай аптовай выставы-кірмашу "Прадэкспа". Сярэдне-спісачная колькасць працаўнікоў - 379 чалавек.