4 лістапада, Віцебск /Сяргей Кочатаў - БЕЛТА/. У Беларусі плануецца распрацаваць асноўны спектр ветэрынарных вакцын і асвоіць іх вытворчасць на айчынных прадпрыемствах. Аб гэтым сёння журналістам паведаміў першы намеснік дырэктара дэпартамента ветэрынарнага і харчовага нагляду Мінсельгасхарчу Беларусі, галоўны дзяржаўны ветэрынарны інспектар Юрый Піваварчык, перадае карэспандэнт БЕЛТА. Па словах Юрыя Піваварчыка, такая задача ставіцца перад айчыннай навукай на бліжэйшы час, а яе выкананне дазволіць у значнай ступені замясціць імпартныя аналагі. Сёння ў Беларусі вядзецца прафілактыка каля 80 небяспечных захворванняў, у гэтай важнай і адказнай працы прымаюць удзел ветурачы і навукоўцы. Вялікае значэнне мае супрацоўніцтва навукоўцаў з розных краін. "Калі ўдаецца аб'яднаць патэнцыял спецыялістаў з розных краін і рэгіёнаў свету, то лягчэй справіцца з захворваннямі, якія не ведаюць межаў, хутчэй можна стварыць спецыфічную прафілактыку, каб у канчатковым выніку прадухіляць значныя эканамічныя страты", - падкрэсліў Юрый Піваварчык. У Віцебскай дзяржаўнай акадэміі ветэрынарнай медыцыны праходзіць міжнародная навукова-практычная канферэнцыя "Сучасныя праблемы ветэрынарнай медыцыны і заатэхніі" з удзелам каля 200 навукоўцаў і спецыялістаў навукова-даследчых цэнтраў, а таксама ветэрынарных ВНУ з Расіі, Украіны, Казахстана і Беларусі. Найбольш прадстаўнічай дэлегацыяй на канферэнцыі нароўні з беларускімі ўдзельнікамі стала каманда расійскіх навуковых устаноў, у якую ўвайшлі супрацоўнікі арганізацый амаль з 20 рэгіёнаў ад Прымор'я да самых заходніх абласцей Расіі.