2 жніўня, Віцебск /Дзіяна Курыло - БЕЛТА/. Пакістан зацікаўлены ў імпарце беларускай сельгас­тэхнікі і стварэнні су­мес­най тэкстыльнай вытвор­часці. Аб гэтым сёння на сустрэчы з кіраўнікамі знешне­тар­говых падраз­дзя­лен­няў прадпрыемстваў Віцебска ў Віцебскім аддзяленні Беларускай тар­го­ва-прамысловай палаты паведаміў міністр па пытаннях гандлю, кіраўнік гандлёвага прадстаўніцтва пасольства Ісламскай Рэспублікі Пакістан у Расійскай Федэрацыі і Рэспубліцы Беларусь Махамад Ільяс Горы, перадае карэспа­ндэнт БЕЛТА. Пакістан з'яўляецца сель­ска­гас­па­дар­чай краінай, тут вялікая патрэбнасць у сучаснай сель­ска­гас­па­дар­чай тэхніцы, а Беларусь за­рэ­ка­мен­да­ва­ла сябе як вытворца якаснай тэхнікі для аграрыяў. Гэтым тлумачыцца зацікаўленасць Пакістана ў беларускіх сель­гас­ма­шы­нах, і ў першую чаргу ў трактарах і запасных частках да іх, растлумачыў міністр. У цяперашні час у Ісламскай Рэспубліцы вядзецца праца па стварэнні су­мес­нага прадпрыемства з Мінскім трактарным заводам. Аднак Махамад Ільяс Горы вы­ка­заў упэўненасць у тым, што прадукцыя Віцебскага завода трактарных запасных частак знойдзе свайго спажыўца. Як расказаў на сустрэчы намеснік дырэктара па камерцыйных пытаннях віцебскага завода Алег Салаўёў, у цяперашні час прадпрыемства, якое з'яўляецца філіялам Мінскага трактарнага завода, каля 35% сваёй прадукцыі рэалізуе ў свабодным продажы, у тым ліку і на экспарт. Сярод партнёраў завода ёсць і пакістанскія пакупнікі. За 6 месяцаў бягучага года Віцебскі завод трактарных запчастак экспартаваў у Пакістан прадукцыі на $100 тыс. "Гэтая сума была б значна вышэй, калі б пакістанскія партнёры напрамую працавалі з беларускім прадпрыемствам, а не праз пасрэднікаў у Расійскай Федэрацыі", - лічыць Алег Салаўёў. "Я бачу вялікі патэнцыял адносін паміж гэтым прадпрыемствам і пакістанскімі партнёрамі", - сказаў Махамад Ільяс Горы і запрасіў кіраўніцтва віцебскага завода прыняць удзел у выставе ў Пакістане, дзе будзе арганізавана сустрэча з патэнцыяльнымі пакупнікамі запчастак.