11 красавіка 1945 года вязні Бухенвальда ўзнялі паўстанне, якое стала сімвалам супраціву фашызму. Гэтая дата была абрана як Міжнародны дзень вызвалення вязняў канцлагераў — у памяць пра мільёны закатаваных у нацысцкіх «фабрыках смерці».
Самыя страшныя ўспаміны пра ваенныя злачынствы ўсё жыццё захоўваюць тыя, чыё дзяцінства прайшло ў канцлагерах. Напярэдадні гэтай памятнай даты работнікі Лепельскага раённага аддзела па НС аказалі адрасную дапамогу малалетняй вязні Таццяне Якаўлеўне Вішнеўскай. Ратавальнікі ўсталявалі аўтаномны пажарны апавяшчальнік, пасля чаго Таццяна Якаўлеўна расказала шмат гісторый пра выпрабаванні, якія ёй давялося перажыць.
Нягледзячы на цяжкія ўспаміны пра жыццё ў канцлагеры, Таццяна Якаўлеўна вельмі прыветлівая і прыязная, выпраменьвае аптымізм. Сёлета ёй споўніўся 91 год, а памятае яна ўсё вельмі выразна, асабліва ваенны час.
У цёплай гутарцы ратавальнікі выслухалі шмат успамінаў вязні, каб перадаць іх нашчадкам і не забываць пра цану, заплачаную за Перамогу.
Прадстаўнікі МНС пажадалі Таццяне Якаўлеўне доўгіх гадоў жыцця, цяпла і ўтульнасці, а яна ў сваю чаргу, пажадала новаму пакаленню берагчы мір і памятаць урокі гісторыі.