Першы беларускі форум-фестываль універсітэтаў трэцяга ўзросту пройдзе ў Мінску, паведаміла БЕЛТА спецыяліст па камунікацыях ГА "Беларуская асацыяцыя сацыяльных работнікаў" Вольга Шышло.
Першы беларускі форум-фестываль універсітэтаў трэцяга ўзросту пройдзе ў Мінску, паведаміла БЕЛТА спецыяліст па камунікацыях ГА "Беларуская асацыяцыя сацыяльных работнікаў" Вольга Шышло.
У форуме возьмуць удзел прадстаўнікі арганізацый і ініцыятыў, якія займаюцца адукацыяй і актывізацыяй, адстойваннем інтарэсаў пажылых людзей, прадстаўнікі дзяржаўных органаў улады.
Дыскусія "Міжнародныя і нацыянальныя планы дзеянняў па пытаннях старэння і роля некамерцыйных арганізацый, акадэмічнай супольнасці, розных адукацыйных пляцовак для дарослых людзей у рэалізацыі гэтых планаў" заяўлена на 25 мая. Сярод спікераў мерапрыемства - старэйшы дарадца Еўрапейскага цэнтра палітыкі і даследаванняў сацыяльнага дабрабыту (Аўстрыя) Аляксандр Сідарэнка, а таксама нацыянальны каардынатар па пытаннях старэння, загадчык аддзела даследаванняў рынку працы, занятасці і сацыяльнай абароны насельніцтва Навукова-даследчага інстытута працы Міністэрства працы і сацыяльнай абароны Беларусі Ганна Закрэўская.
На наступны дзень удзельнікі форуму абмяркуюць магчымасці супрацоўніцтва паміж арганізацыямі, якія займаюцца адукацыяй дарослых, а таксама магчымасць стварэння ў Беларусі нефармальнай сеткі такіх арганізацый. У гэтай частцы праграмы будуць прадстаўлены вопыт Украіны і Расіі, а таксама краін Балтыі, якія клапоцяцца аб павышэнні якасці жыцця пажылых людзей.
Таксама 26 мая пачнецца фестываль лепшых практык, для якога прадстаўнікі беларускіх і замежных арганізацый падрыхтуюць майстар-класы, прэзентацыі, выставы. А на трэці дзень удзельнікаў чакае святочны гала-канцэрт, прысвечаны 5-годдзю Мінскага ўніверсітэта трэцяга ўзросту.
Падрабязная праграма форуму-фестывалю будзе сфарміравана пасля зацвярджэння спісу ўдзельнікаў. Прыём заявак працягнецца да 14 мая.
Арганізатарамі з'яўляюцца ГА "Беларуская асацыяцыя сацыяльных работнікаў" (Мінск), Цэнтр дадатковай адукацыі дарослых "Студыя карысных кампетэнцый" і ГА "Цэнтр інфармацыйнай падтрымкі грамадскіх ініцыятыў "Трэці сектар" (Гродна). Партнёрамі выступаюць Прадстаўніцтва ЮНФПА ў Беларусі, Міжнароднае грамадскае аб'яднанне "Узаемаразуменне" (Мінск), DVV-International і сталічная ўстанова "Цэнтр актыўнага даўгалецця".