Віцебскі раён лідзіруе ў вобласці па тэмпах жніва, перавышаючы сярэднеабласны паказчык амаль у паўтара раза (43 працэнты супраць 29). У раёне ўжо 11 экіпажаў-«тысячнікаў», сярод якіх тры моладзевых. Першым «двухтысячнікам» сярод зернеўборачных экіпажаў усёй Віцебскай вобласці стаў механізатар УП «Рудакова» Валянцін Яшчанка.
Валянцін Яшчанка працуе ў сельскай гаспадарцы ўжо 18 гадоў, шэсць з якіх – ва УП «Рудакова». У Віцебскі раён ён пераехаў разам з сям'ёй з Шаркаўшчынскага раёна па радзе сябра. Спачатку гаспадарка выдзеліла шматдзетнай сям'і дом у аграгарадку Ноўка, а затым ім далі кватэру ў новым доме ў аграгарадку Тулава.
Калі шэсць гадоў таму Валянцін прыйшоў механізатарам ва УП «Рудакова», адразу стаў першым тысячнікам у раёне, і з тых часоў трымае гэту планку. Аднак, прызнаецца, сёлета ўпершыню стаў перадавіком на абласным узроўні.
Старшыня Віцебскага аблвыканкама Аляксандр Субоцін прама ў полі павіншаваў Валянціна Яшчанку і пажадаў узяць новую вышыню ў 3 тысячы тон і ўручыў памятны падарунак.
Моцнага здароўя, дабрабыту ў сям'і і вярнуцца дадому пасля жніва з поўнай кішэняй грошай пажадаў памочнік Прэзідэнта – інспектар па Віцебскай вобласці Анатоль Ліневіч:
– Ёсць дзве самыя важныя прафесіі – Радзіму абараняць і хлеб прыбіраць. Вы выбралі адну з іх і паказваеце, як нашы беларусы годна працуюць на ніве хлебнай. Поспехаў Вам!
Крыніца: vitebsk-region.gov.by