Першымі ўдзельнікамі малога памежнага руху з Латвіяй стануць каля 200 жыхароў Віцебскай вобласці

З МАЛОЙ ДЗЕЙНАСЦІ ПАЧЫНАЕЦЦА ВЯЛІКІ КРОК Да выдачы дазволаў на спрошчанае перасячэнне дзяржаўнай мяжы жыхарамі памежных тэрыторый Беларусі і Латвіі засталіся лічаныя дні: у адпаведнасці з пагадненнем паміж урадамі Беларусі і Латвіі аб спрошчаным парадку ўзаемных паездак жыхароў памежных тэрыторый консульскія ўстановы пачнуць прыём дакументаў на выдачу дазволаў ужо з 1 лютага бягучага года. У консульства Латвіі ў Віцебску ўжо паступілі спісы жыхароў памежных тэрыторый Віцебскай вобласці, якія пажадалі скарыстацца магчымасцю мясцовага памежнага руху, распавяла карэспандэнту БЕЛТА кіраўнік консульства Латвійскай Рэспублікі ў Віцебску Дагнія Лацэ-Атэ. Як і чакалі, першы спіс з беларускага боку не такі вялікі - у ім каля 200 чалавек. З латвійскага боку ў першым спісе каля 4 тыс. чалавек. Гэта абумоўлена тым, што да тэрыторыі, жыхары якой могуць скарыстацца правам спрошчанага перасячэння мяжы, адносяцца такія буйныя гарады, як Даўгаўпілс і Краслава. Спісы, перададзеныя ў консульства, сфарміраваны мясцовымі сельскімі, пасялковымі і гарадскімі выканкамамі на падставе заяў грамадзян. Аднак гэтыя пералікі не канчатковыя. Грамадзяне могуць падаваць заявы па меры неабходнасці, і кожныя тры месяцы спісы будуць абнаўляцца. Наступны будзе сфарміраваны да 1 красавіка, а прыём заяў на выдачу дазволаў ужо па абноўленых спісах консульства пачне з 1 мая, удакладніла Дагнія Лацэ-Атэ.

Што ж патрабуецца для атрымання дазволу на спрошчанае перасячэнне мяжы з Латвіяй? Па-першае, неабходна не менш за год пражываць на памежнай тэрыторыі, да якой адносяцца Бігосаўскі, Чапаеўскі, Сар'янскі, Асвейскі, Коханавіцкі, Белькаўшчынскі сельсаветы Верхнядзвінскага раёна, горад Верхнядзвінск; Повяцкі, Перабродскі, Даўгінаўскі, Міёрскі, Новапагосцкі, Туркоўскі сельсаветы Міёрскага раёна, горад Міёры; Друеўскі, Плюскі, Слабодкаўскі, Опсаўскі, Далякоўскі, Ахрэмаўскі, Межанскі, Цецярскі, Відзаўскі сельсаветы Браслаўскага раёна, горад Браслаў, пасёлак Відзы. Тут варта адзначыць, што ўмова пражывання не менш за год на тэрыторыі не распаўсюджваецца на астатніх членаў сям'і, якія вядуць агульную гаспадарку, напрыклад, на мужоў, дзяцей. Калі браслаўчанін, які даўно жыве ў раёне, захоча пазнаёміць сваю латвійскую радню з маладой жонкай, якую ён прывёз з Брэста, то яна можа падаваць заяву, нягледзячы на тое, што жыве на тэрыторыі менш за ўстаноўлены тэрмін. Падставай для выдачы дазволу можа служыць не толькі наведванне сваякоў. Арганізацыя або ўдзел у культурных, адукацыйных, навуковых і спартыўных мерапрыемствах, якія праводзяцца органамі ўлады і ўстановамі Беларусі і Латвіі, валоданне нерухомасцю, наведванне месцаў пахавання сваякоў, атрыманне медыцынскай дапамогі, удзел у мерапрыемствах, звязаных з мясцовымі традыцыямі і правядзеннем рэлігійных абрадаў, рэгулярныя бізнес-кантакты – усё гэта таксама можа служыць падставай для наведвання памежных раёнаў суседняй краіны.Другі крок для атрымання дазволу – гэта падаванне ў консульства дакументаў. З сабой неабходна мець пашпарт, патрабаванні да яго такія ж, як і пры выдачы віз: пашпарт павінен быць не старэйшы за дзесяць гадоў, ён павінен быць сапраўдным не менш чым тры месяцы пасля заканчэння тэрміну дзеяння дазволу. Анкету на атрыманне дазволу можна запоўніць непасрэдна ў консульстве, а можна надрукаваць яе з сайта http://www.mfa.gov.lv/by/belarus/konsulate/ і падаць ужо запоўненую. Для зручнасці грамадзян анкета на атрыманне дазволу падобная да анкеты на атрыманне візы, таму ў консульстве ўпэўнены, што праблем з яе запаўненнем не ўзнікне. Абавязковымі для падавання таксама з'яўляюцца фотаздымак грамадзяніна, зробленая не раней чым за тры месяцы да звароту, а таксама медыцынская страхоўка. Прычым страхоўка неабходна толькі на першае наведванне, таксама як і ў выпадку выдачы шматразовай візы. Кошт дазволу, у адпаведнасці з пагадненнем, будзе складаць 20 еўра. Ад выплаты пошліны вызваляюцца пенсіянеры, інваліды і непаўналетнія. Тэрмін разгляду дакументаў на атрыманне дазволу – 20 рабочых дзён. Аднак у консульстве Латвіі запэўнілі, што будуць старацца афармляць дакументы як мага хутчэй. Консульства будзе працаваць у звычайным рэжыме: прымаць дакументы будуць з панядзелка па чацвер з 10 да 13 гадзін, выдаваць – з панядзелка па чацвер з 15 да 16 гадзін. У латышоў ёсць народная песня, у якой распавядаецца пра дзвюх сясцёр, якія жывуць на розных берагах Даўгавы, але спяваюць адну песню. Менавіта так, з пункту гледжання Дагніі Лацэ-Атэ, выглядаюць узаемаадносіны жыхароў Віцебскай вобласці і Латгаліі. "У народаў глыбокія сувязі, якія фарміраваліся стагоддзямі. Гэта велізарны патэнцыял для далейшага ўзаемадзеяння ў сферы культуры, адукацыі і бізнесу. А адкрыццё мясцовага памежнага руху будзе гэтаму толькі спрыяць", - упэўнена кіраўнік консульства. Дзіяна КУРЫЛА, БЕЛТА.-0-

БЕЛТА