Кіраўніцтва Віцебскага аблвыканкама высадзіла каля 7000 саджанцаў сосны ў Лёзненскім раёне.
- Традыцыйна мы прывыклі высаджваць лес у вясновы перыяд. Сёлета наш Прэзідэнт задаў тон восеньскай акцыі. Адна з прычын – ураган, які засцігнуў нас летам. Тады эпіцэнтрам ветравалаў і бураломаў стала Гомельшчына. У нашай вобласці паваліла больш за сотню гектараў лесу. Бедства, якое здарылася, стымулявала нас яшчэ больш пільна звярнуць увагу на абнаўленне лесу, - падкрэсліў старшыня Віцебскага аблвыканкама Аляксандр Субоцін.
Кіраўнік вобласці адзначыў, што няхай плошча адноўленага лесу невялікая - адзін гектар, але на ёй былі пасаджаны тысячы дрэў, яны будуць радаваць наступныя пакаленні.
- Прыемна, што нават нікому не даводзіцца прапаноўваць удзельнічаць у акцыі, людзі самі з задавальненнем едуць у лес, каб высадзіць дрэвы. Такія мерапрыемствы дазваляюць калектыву змяніць абстаноўку, сумесна папрацаваць, пагутарыць і зблізіцца – стаць яшчэ больш маналітным, - падкрэсліў Аляксандр Субоцін.
Генеральны дырэктар Віцебскага ДВА «ЛПВА» Юрый Ліпскі паведаміў, што работнікі аблвыканкама папрацавалі прадуктыўна:
- Гэта дасведчаныя людзі, якія ведаюць, як правільна закладваць лясныя культуры. Перад пачаткам акцыі мы паказвалі вынікі лесааднаўлення мінулага і пазамінулага гадоў. Гэта ў тым ліку ўчасткі, дзе працавалі работнікі аблвыканкама.
Нагадаем, у краіне з 12 кастрычніка праходзіць рэспубліканская добраахвотная акцыя «Дай лесу новае жыццё». Старт ёй даў асабіста Прэзідэнт Беларусі Аляксандр Лукашэнка падчас рабочай паездкі на малую радзіму ў Шклоўскі раён. Акцыя накіравана на аднаўленне участкаў лесу, пацярпелых ад урагану.
Дарэчы, да 12 лістапада далучыцца да яе можа любы ахвотны. Каб унесці свой уклад у аднаўленне лясных багаццяў краіны, трэба звярнуцца ў мясцовы лесгас.