26 лістапада, Віцебск /Дзіяна Курыло - БЕЛТА/. Фінансавы рэсурс даступных Беларусі праграм трансгранічнага супрацоўніцтва Еўрапейскага інструмента добрасуседства і партнёрства на перыяд да 2013 года ацэньваецца амаль у 250 млн. еўра. Аб гэтым сёння ў Віцебску на інфармацыйным дні праграм Еўрасаюза ў Беларусі паведаміў эксперт па пытаннях праграм тэхнічнай дапамогі ЕС Уладзімір Беліцкі, перадае карэспандэнт БЕЛТА. Беларусь з'яўляецца ўдзельнікам трох праектаў трансгранічнага супрацоўніцтва "Рэгіён Балтыйскага мора", "Латвія-Літва-Беларусь", "Польшча-Беларусь-Украіна". Рэсурсы могуць быць выкарыстаны пры рэалізацыі нацыянальных і рэгіянальных праграм сацыяльна-эканамічнага развіцця Беларусі, што прывядзе да скарачэння выдаткаў дзяржбюджэту на падобныя мэты. Таму асабліва важна, каб у праектах гэтых праграм актыўна ўдзельнічалі рэспубліканскія органы дзяржкіравання і органы мясцовай улады нароўні з грамадскімі аб'яднаннямі і іншымі арганізацыямі і ўстановамі, падкрэсліў Уладзімір Беліцкі. Удзел у праектах міжнароднай тэхнічнай дапамогі ЕС не ацэньваецца толькі фінансавымі рэсурсамі. Праекты рэалізуюцца на аснове заявак некалькіх удзельнікаў з суседніх дзяржаў і з'яўляюцца партнёрскімі, пабудаванымі на прынцыпе зносін паміж людзьмі і супрацоўніцтва з калегамі. У выніку такога партнёрства ўмацоўваецца патэнцыял арганізацый-удзельніц, ажыццяўляецца навучанне супрацоўнікаў, адбываецца абмен інфармацыяй, што служыць наладжванню культурных і дзелавых кантактаў, упэўнены эксперт. У цэлым па праграмах міжнароднай тэхнічнай дапамогі ЕС для Беларусі прадугледжана больш за 350 млн. еўра.