22 красавіка, Віцебск /Дзіяна Курыла - БЕЛТА/. Амаль 60 тыс. сем'яў у Віцебскай вобласці стануць новасёламі сёлета дзякуючы зменам, унесеным ва ўказ №13, які рэгулюе сферу жыллёвага будаўніцтва. Пра гэта паведаміў карэспандэнту БЕЛТА намеснік старшыні Віцебскага аблвыканкама Анатоль Дзіулін. Да прыняцця ўказа №184 грамадзяне, якія будавалі жыллё, але не трапілі пад дзеянне ўказа №13, вымушаны былі браць крэдыты на будаўніцтва пад высокія працэнтныя стаўкі - 36% гадавых. Людзям было няпроста, многія апыняліся ў патавай сітуацыі. Дзякуючы зменам гэтыя забудоўшчыкі атрымалі магчымасць дакрэдытавацца на ранейшых умовах. Сутнасць указа №184 у тым, што прадастаўленне льготных крэдытаў грамадзянам, якія заключылі крэдытныя дагаворы да ўступлення ў сілу ўказа №13 "Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструкцыі) або набыцці жылых памяшканняў" ад 6 студзеня 2012 года, і суправаджэнне гэтых крэдытных дагавораў у межах тэрміну іх дзеяння будуць ажыццяўляцца на ўмовах, прадугледжаных заключанымі крэдытнымі дагаворамі і заканадаўствам, што дзейнічала на момант іх заключэння (з улікам прадастаўлення адтэрміноўкі ў адпаведнасці з ч.2 падпункта 1.12 пункта 1 указа №13). "Такім чынам, велізарная колькасць кватэр, будаўніцтва якіх было пачата ў 2011 і запланавана да ўводу ў 2012-м, будзе дакрэдытавана на старых умовах. У Віцебскай вобласці гэта 170 тыс. кв.м жылля, на якое будзе выдзелена каля Br150 млрд. Амаль 60 тыс. сем'яў змогуць адсвяткаваць у бягучым годзе наваселле", - паведаміў Анатоль Дзіулін. Таксама з'явілася магчымасць не спыняць будаўніцтва дамоў, запланаваных да ўводу ў 2013 годзе. Намеснік старшыні аблвыканкама растлумачыў, што грамадзяне, якія атрымалі магчымасць дакрэдытавацца на ранейшых умовах, павінны ў бліжэйшыя дні звярнуцца ў банк, які фінансуе, як правіла, гэта "Беларусбанк". Гарадскія і раённыя выканкамы пацвярджаюць патрэбнасць грамадзян у дадатковым крэдытаванні, рыхтуюць спісы і перадаюць іх у банк.