19 лістапада, Мінск /Кар. БЕЛТА/. Пагадненне аб прадастаўленні Рэспубліцы Беларусь пазыкі Сусветнага банка ў памеры $150 млн. падпісана сёння ў Мінску, перадае карэспандэнт БЕЛТА. Сродкі пойдуць на праект "Удасканаленне і мадэрнізацыя аўтамабільнай дарогі". Пагадненне падпісалі міністр транспарту і камунікацый Беларусі Іван Шчэрба і кіраўнік прадстаўніцтва Сусветнага банка ў Беларусі Іван Велеў. Рашэнне аб прадастаўленні пазыкі было прынята саветам выканаўчых дырэктараў Сусветнага банка 11 лістапада 2010 года. Мэтай гэтага праекта з'яўляецца садзейнічанне ў развіцці транспартнай інфраструктуры стратэгічнага транзітнага калідора і ўвядзенне электроннай сістэмы аплаты дарожных збораў. На першым этапе праекта, на які выдзяляецца $131 млн., будуць праведзены мерапрыемствы па пераабсталяванні ўчасткаў дарогі з дзвюма палосамі руху паміж Мінскам і Бабруйскам агульнай працягласцю 53 км. Будзе створана аўтамагістраль з чатырма палосамі руху. Рэканструюемы ўчастак дарогі з'яўляецца часткай трансеўрапейскага транспартнага калідора IX, які злучае Чорнае мора з краінамі Балтыі. Як адзначыў Іван Шчэрба, будзе рэканструяваны невялікі ўчастак дарогі - 53 км, але яго неабходна давесці да стану першай катэгорыі еўрапейскіх стандартаў. На дарозе будзе пакладзена якаснае пакрыццё, будзе забяспечана інфраструктура, траса будзе адпавядаць усім неабходным умовам бяспекі транспарту. Пазыка прадастаўляецца Сусветным банкам на 15 гадоў з адтэрміноўкай выплат асноўнай сумы доўгу на працягу 5 гадоў. Рэалізацыя праекта пачнецца ў сакавіку 2011 года і зойме 4 гады. Па словах Івана Велева, гэта першы дарожны праект Сусветнага банка ў Беларусі. Ён яшчэ раз пацвярджае канструктыўнае супрацоўніцтва Беларусі і СБ. "Гэта самы вялікі інвестыцыйны праект Сусветнага банка ў Беларусі з 1992 года", - падкрэсліў Іван Велеў. "Праект вельмі выгадны, ён станоўча адзаначаецца на знешнім балансе і тавараабароце Беларусі, яе транзітнай прывабнасці, створыць новыя працоўныя месцы, праз Беларусь пойдзе большая частка транспартных патокаў", - адзначыў кіраўнік прадстаўніцтва. Беларусь стала членам Сусветнага банка ў 1992 годзе. За гэты час краіне ў агульнай складанасці было выдзелена $643 млн. на рэалізацыю дзевяці праектаў; каля 30 нацыянальных праграм атрымалі грантавую падтрымку на агульную суму $18 млн. У цяперашні час Беларусь выкарыстоўвае сродкі Сусветнага банка для фінансавання чатырох праектаў па развіцці інфраструктуры.