Паядынкі на татамі

Прайшоў традыцыйны турнір па дзюдо на прызы старшыні Лепельскага райвыканкама.

Прайшоў традыцыйны турнір па дзюдо на прызы старшыні Лепельскага райвыканкама. Змагацца за ўзнагароды прыехалі наймацнейшыя спартсмены з Оршы, Полацка, Наваполацка, Віцебска і Мінска. Як і ў мінулыя гады, мерапрыемства было маштабным, паўсюль панавала атмасфера баявога духу.

Некалькі гадзін доўжыліся індывідуальныя баі. Больш за семдзесят дзюдаістаў выйшлі на татамі. Самая шматлікая каманда лепельчан. Аднак усе разумеюць, галоўнае тут не колькасць, а магчымасці кожнага асобнага ўдзельніка. І яны аказаліся вялікія. Шэсць першых месцаў атрымалі выхаванцы трэнераў Георгія, Галіны і Аляксея Паповых.

Настаў урачысты момант узнагароджання пераможцаў у асабістым заліку. Павіншаваць юных спартсменаў з іх дасягненнямі прыбыў старшыня райвыканкама Барыс Ефрэмаў. Бронзавыя і сярэбраныя прызёры атрымалі медалі, Дыпломы і моцнае поцісканне рукі ад кіраўніка раёна, а залатыя медалісты ў дадатак да таго - каштоўныя прызы. Парадавала колькасць і разнастайнасць падарункаў турніру. Так, абсалютная пераможца ў сваёй вагавой катэгорыі Ганна Ганчар стала ўладальніцай набору прыстасаванняў для падводнага плавання, а мама, якая прыйшла за яе пабалець, адзначыла, што прызы ў гэтым годзе асабліва добрыя. Разам з Аняй узнагародамі за першае месца засталіся задаволены Ілья Леўко, Арцём Глушонак, Гаджымурад Дзівін, Дзмітрый Грук і Мікіта Старавойтаў. Акрамя стандартных ганаровых званняў, арганізатары адзначылі па тры дзюдаісты ў намінацыі «За волю да перамогі» і «За лепшую тэхніку». «Прыз гледачовых сімпатый» дастаўся лепельчаніну Аляксандру Пашкевічу. Срэбны прызёр чэмпіянату Еўропы Яўген Міхно быў адзначаны за высокія дасягненні электроннымі вагамі і грашовай прэміяй у памеры аднаго мільёна рублёў. Дзмітрый Грук за залаты медаль на першынстве рэспублікі заахвочаны васьмюстамі тысячамі рублёў.

Вялікай радасцю для выхаванцаў і трэнераў стала навіна: старшыня райвыканкама Барыс Ефрэмаў асабіста ацаніў стан Лепельскай СДЮШАР па дзюдо і паабяцаў дапамагчы з рамонтам.

***

Пасля цырымоніі ўзнагароджання наступіў другі этап спаборніцтваў – камандная барацьба, у побыце званая «сценка на сценку». Падтрымліваюць сваіх выхаванцаў трэнеры, прыцягваюць увагу заўзятары на лаўках. Надзея Шайтор прыйшла паглядзець выступленне ўнука Дзмітрыя Грука. Яна часта суправаджае яго на розных спаборніцтвах. Васьмікласнік Дзіма займаецца з васьмі гадоў і за гэты час яго бабуля вывучыла спартыўную тэрміналогію, часам тлумачыць правілы іншым заўзятарам, каментуе ход барацьбы.

Графік у дзюдаіста насычаны - у месяц бывае па тры выезды. Затое вынікі цешаць усю сям'ю.

Не можа нарадавацца на свайго сына і Людміла Глушонак. Каб той заўсёды мог пастаяць за сябе, вырашыла аддаць яго на барацьбу. Выбрала дзюдо і не шкадуе. Бо дзякуючы гэтаму спорту дзіця выплюхвае лішнюю энергію і дома праяўляе стараннасць, спакойна робіць урокі, не спяшаецца гуляць на вуліцу, не псуе зрок, гадзінамі седзячы за камп'ютэрнымі гульнямі. Прыемна назіраць, калі бацька прымае ўдзел у жыцці дзіцяці, надае яму належную ўвагу. Аднак тут патрабуюцца не толькі маральныя выдаткі… Спартыўная экіпіроўка каштуе прыстойных грошай, зрэшты, і паездкі таксама. Так, кімано часта купляюць б/у, малады і здаровы арганізм усё роўна хутка з яго вырастае. Зшыць самому нельга – там спецыяльная тканіна і крой. У траўні Людміла Пятроўна рыхтуецца адправіць сына ў Чэхію – гэта больш за дзвесце еўра. Клапатлівая мама выказваецца так: «Ну, не куплю сабе абноўку, зэканомлю для Арцёма». У ходзе размовы высветлілася, Аня Ганчар і Арцём Глушонак нарадзіліся ў адзін дзень, больш таго, оба паказваюць добрыя вынікі і на трэніроўках часта выходзяць на спарынгі.

У каманднай барацьбе выявіліся дзве наймацнейшыя каманды Лепеля і супольная Полацка, Наваполацка. З прыстойным перавагай перамаглі лепельчане. Салодкія прызы дасталіся ўсім без выключэння.

Яўгенія ЛЯХ.

На здымку: старшыня райвыканкама Барыс Ефрэмаў уручае каштоўны прыз Ільі Ляўко; Дзмітрый Грук пасля перамогі абдымае сваю адданую заўзятарку – бабулю Надзею Шайтор.
Фота аўтара.