29 кастрычніка, Мінск /Васіль Малашэнкаў - БЕЛТА/. Паказчыкі сацыяльна-эканамічнага развіцця Беларусі за мінулы перыяд гэтага года сведчаць аб вяртанні краіны на траекторыю ўстойлівага развіцця. Аб гэтым сёння на сумесным пасяджэнні палат Нацыянальнага сходу Беларусі заявіў намеснік прэм'ер-міністра Уладзімір Патупчык, перадае карэспандэнт БЕЛТА. Віцэ-прэм'ер адзначыў, што Беларусь мэтанакіравана ідзе па шляху павышэння ўзроўню жыцця і, што самае галоўнае, шляху фарміравання канкурэнтаздольнага чалавечага капіталу. Згодна са справаздачай ААН, за 2009 год Беларусь увайшла ў лік краін з высокім узроўнем развіцця чалавечага патэнцыялу і заняла 68-е месца. Пры гэтым краіна атрымала самы высокі рэйтынг у СНД. Прэзідэнтам Беларусі пастаўлена задача - да 2013 года выйсці на 50-е месца ў гэтым рэйтынгу. Гэта запатрабуе напружанай працы і прыняцця пэўных сацыяльных, дэмаграфічных і іншых мер. У той жа час посткрызісная сітуацыя прымусіла многія дзяржавы па-новаму паглядзець на сваё развіццё. У Беларусі ў цяперашні час распрацоўваюцца шэраг праграмных дакументаў, у тым ліку праграма сацыяльна-эканамічнага развіцця на 2011-2015 гады. Гэты дакумент будзе вынесены на абмеркаванне на чацвёртым Усебеларускім народным сходзе. Адным з прыярытэтаў для далейшага развіцця краіны пазначаны інавацыйны шлях, які абапіраецца на чалавечы фактар. Уладзімір Патупчык падкрэсліў, што эканамічная палітыка нашай краіны заўсёды мела выразную сацыяльную накіраванасць. Удзельная вага сацыяльных выдаткаў у агульнай суме кансалідаванага бюджэту ў бягучым годзе складае 53% (Br19,2 трлн.). У наступным годзе плануецца павялічыць гэту лічбу да сумы, якая перавышае Br27 трлн. Гэта дазволіць павялічыць базавыя сацыяльныя выдаткі на 40%. У прыватнасці, плануецца, што ў 2011 годзе будуць павялічаны сацыяльныя выплаты, стыпендыі, заробкі бюджэтнікаў. Павышэнне апошніх, на думку віцэ-прэм'ера, з'яўляецца надзвычай важным для канкурэнтаздольнасці эканомікі і дапаможа замацаваць спецыялістаў у гэтых галінах.-0-

БЕЛТА