Нягледзячы на тое, што ГСК — нейкая арганізацыя, менавіта арганізацыі ёй, як правіла, і не хапае. Аб'яднаныя ў кааператыў уладальнікі, атрымаўшы запаветнае машынамесца і пабудаваўшыся, не вельмі клапоцяцца ў далейшым пра жыццё ў кааператыве.

Праўда, пры гэтым чамусьці не забываюць скардзіцца на смецце і дрэнныя дарогі…

Усё гэта (і смецце, і дрэнныя дарогі) сапраўды прысутнічае на тэрыторыі любога ГСК. Нават не сумнявайцеся. І пытанне звычайна ставіцца так: у якіх колькасцях прысутнічае, і што робіцца для навядзення парадку.

— У нашым раёне зарэгістравана 17 гаражна-будаўнічых кааператываў, але далёка не ўсе яны функцыянуюць так, як гэта належыць, г.зн. слядоў уборкі не відаць, своечасовы вываз адходаў, відавочна, таксама нікога не турбуе. Як і напаўразбураныя будынкі на тэрыторыі. Не зусім зразумела, чаму людзі так ставяцца да агульнай справы, — кажа інспектар аддзела архітэктуры і будаўніцтва, жыллёва-камунальнай гаспадаркі Ганна Малашанка. — Не раз даводзілася чуць размовы пра тое, што на добраўпарадкаванне кааператывам проста не хапае сродкаў, таму што не здаюцца членскія ўнёскі. Пазіцыя больш чым дзіўная. Каб нешта змяніць, трэба не наракаць, а працаваць з членамі кааператыва. Вырашаць праблему можна толькі разам. Але мы бачым, што вынік працы далёка не відавочны менавіта ў гаражных кааператывах. Людзі недастаткова матываваныя і выхаваныя, каб клапаціцца пра добраўпарадкаванне агульнай тэрыторыі. Многія старшыні ў кааператывах працуюць на грамадскіх пачатках, не ў поўнай меры выконваюць свае абавязкі.

А наогул жыццё яшчэ раз даказвае, што ўсё ў канчатковым выніку залежыць ад чалавека. Калі ён добры гаспадар у сваім доме, то і на працы, і на дачы, і ў гаражы ў яго таксама будзе парадак. Аднак папракаць толькі несумленных членаў кааператываў нельга: так праца не зрушыцца з месца. Трэба даносіць неразумным уладальнікам гаражоў, што разам з гаражом набываецца і доля адказнасці, што ўся дзейнасць кааператываў ажыццяўляецца толькі за кошт членскіх унёскаў уладальнікаў гаражоў. Кожны гаражны кааператыў абавязаны сачыць за добраўпарадкаваннем сваёй тэрыторыі і тэрыторыі, прылеглай да кааператыва. Пры невыкананні норм і правілаў кааператыў нясе поўную адказнасць як юрыдычная асоба.