Полацкая ГЭС будзе ўведзена 30 чэрвеня, Віцебская – праз месяц

Полацкая ГЭС афіцыйна будзе ўведзена 30 чэрвеня, Віцебская - праз месяц. Пра гэта паведаміў сёння журналістам, адказваючы на пытанне карэспандэнта БЕЛТА, генеральны дырэктар РУП "Віцебскэнерга" Міхаіл Лузін.

"Акт уводу Полацкай ГЭС мы падпішам ужо ў гэтую пятніцу, Віцебская ГЭС будзе ўведзена 31 ліпеня. Але тут гаворка ідзе пра афіцыйнае падпісанне актаў. Між тым абедзве станцыі ўжо каля паўгода працуюць у тэставым рэжыме, выпрацоўваюць энергію. І падрыхтаваны персанал разам і пад наглядам спецыялістаў нашых субпадрадных арганізацый абслугоўвае ўсталяванае там абсталяванне", - сказаў Міхаіл Лузін.

Ён падкрэсліў, што набраныя каманды работнікаў прайшлі ўсю неабходную падрыхтоўку. "На постсавецкай прасторы гідраэнергетыка вельмі добра развітая, таму мы яшчэ некалькі гадоў таму адабралі нашых лепшых спецыялістаў і ўвесь гэты час планамерна вялі адпаведную падрыхтоўку на ГЭС у Расіі і Украіне, былі стажыроўкі і на Гродзенскай ГЭС", - адзначыў гендырэктар.

Рэалізацыя інвестыцыйнага праекта "Будаўніцтва Полацкай ГЭС на рацэ Заходняя Дзвіна Віцебскай вобласці" пачата РУП "Віцебскэнерга" ў 2011 годзе. Усталяваная электрычная магутнасць станцыі складзе 21,66 МВт - дастаткова, каб пакрыць спажыванне чатырох раёнаў: Лепельскага, Ушацкага, Чашніцкага і Расонскага. Генеральным падрадчыкам будаўніцтва выступае расійскае ААТ "ВА "Тэхнапрамэкспарт", а абслугоўваннем аб'екта на дадзенай стадыі сумесна са спецыялістамі РУП "Віцебскэнерга" займаюцца прадстаўнікі чэшскай кампаніі Mavel, чыё абсталяванне ўсталявана на ГЭС.

Магутнасць Віцебскай ГЭС складзе 40 МВт, будаўніцтвам гідравузла займаецца Кітайская нацыянальная карпарацыя па электраабсталяванні (CNEEC).

На дадзены момант вядзецца пошук інвестара для Бешанковіцкай ГЭС магутнасцю 33 МВт, якая павінна завяршыць каскад станцый на рацэ Заходняя Дзвіна ў адпаведнасці з дзяржпраграмамі будаўніцтва гідраэлектрастанцый і развіцця Беларускай энергетычнай сістэмы. "Гэты аб'ект вельмі актуальны, таму што менавіта Бешанковіцкая ГЭС павінна падняць узровень вады ў межах Віцебска. На жаль, наш фінансавы стан вымушае выкарыстоўваць схему прыцягнення прамых замежных інвестыцый. Сёння ёсць варыянты, якія прапанаваны кітайскай карпарацыяй, кампаніяй са Славакіі. Была і прапанова ад расійскай кампаніі. Але нас як энергетыкаў усе яны пакуль не зусім задавальняюць, таму што мы думаем перш за ўсё пра спажыўца. Мы не можам дазволіць, каб дарагія ўмовы інвестара адбіліся на павышэнні тарыфаў для насельніцтва", - растлумачыў Міхаіл Лузін.

Увод каскада гідраэлектрастанцый дазволіць эканоміць на куплі паліўных рэсурсаў каля $24 млн у год (пры цане на газ на сённяшні дзень). Знізіцца і нагрузка на экалогію.

Міхаіл Лузін прысутнічаў сёння на адкрыцці Рэспубліканскіх спаборніцтваў брыгад па рамонце і абслугоўванні размеркавальных электрычных сетак у Віцебску, якія праходзяць на базе філіяла "Вучэбны цэнтр" РУП "Віцебскэнерга" з 27 па 30 чэрвеня. Яны ўключаюць сем розных этапаў ад праверкі тэарэтычных ведаў да адпрацоўкі самых розных сітуацый на практыцы. Удзельнічаюць каманды шасці абласных энергасістэм.

Навіны Беларусі (БЕЛТА)