6 чэрвеня, Віцебск /Вольга Багачова - БЕЛТА/. Полацкі малочны камбінат інвеставаў за студзень-май у развіццё вытворчасці больш за Br10 млрд., паведаміў карэспандэнту БЕЛТА дырэктар прадпрыемства Уладзімір Яцкевіч. Сродкі накіраваны на рэалізацыю двух праектаў. У прыватнасці, у цяперашні час на камбінаце мадэрнізуецца ўчастак фасоўкі малака, для якога набыта славацкае абсталяванне. Увод у эксплуатацыю плануецца ў бягучым месяцы. За кошт рэалізацыі праекта на 20% павялічацца магутнасці гэтага ўчастка і значна палепшацца ўмовы працы работнікаў. Акрамя таго, у цэх сухога малака для ўчастка згушчэння малака набыта новае абсталяванне коштам 450 тыс. еўра, запуск якога дазволіць на 10% павысіць прадукцыйнасць вытворчасці і на 30-35% знізіць спажыванне энергетычных рэсурсаў для выпуску прадукцыі. Тэрмін завяршэння праекта - трэці квартал. У 2012 годзе прадпрыемства мае намер таксама мадэрнізаваць аміячна-халадзільную ўстаноўку ў кампрэсарным цэху. Праектна-каштарысная дакументацыя распрацоўваецца. За студзень-май гэтага года камбінат выпусціў прадукцыі на Br188 млрд., што больш чым у 2,7 раза перавышае паказчыкі аналагічнага перыяду мінулага года. Экспарт за гэты перыяд вырас на 10% да $10,5 млн. Прадпрыемства заснавана ў 1987 годзе. Асартымент налічвае больш за 70 найменняў малочных прадуктаў, якія выпускаюцца пад гандлёвай маркай "Малочное раздолле". Сярэднеспісачная колькасць працаўнікоў - звыш 760 чалавек.-0-

БЕЛТА