Убачыць сапраўдны медаль зімовай Алімпіяды-2014, сфатаграфавацца з чэмпіёнамі. Думаеце, апісваю мару гарачых заўзятараў? Не! Гэта рэальнасць вучняў СШ №1. Аднойчы ў маі гульцы жаночай хакейнай зборнай ЗША, якая заваявала срэбра на Алімпійскіх Гульнях у Сочы, – Джулі Чу і Хілары Найт – пабывалі на Лепельшчыне.
Убачыць сапраўдны медаль зімовай Алімпіяды-2014, сфатаграфавацца з чэмпіёнамі. Думаеце, апісваю мару гарачых заўзятараў? Не! Гэта рэальнасць вучняў СШ №1. Аднойчы ў маі гульцы жаночай хакейнай зборнай ЗША, якая заваявала срэбра на Алімпійскіх Гульнях у Сочы, – Джулі Чу і Хілары Найт – пабывалі на Лепельшчыне. Пра сочынскую Алімпіяду, распарадак дня і нават музычныя перавагі – яны з задавальненнем расказалі пра ўсё, што цікавіла школьнікаў.
Разам са спартсменкамі прыехала і першы сакратар Пасольства ЗША ў Рэспубліцы Беларусь Робін Саламон. Вучэбныя матэрыялы для вывучэння англійскай мовы коштам больш за 800 долараў і ВК-тэлевізар за дзве тысячы долараў – падарунак школе.
Сустракалі гасцей хлебам-соллю. Усмешкі, цёплыя абдымкі – нібыта пасля доўгіх гадоў убачылі старых сяброў. Далей вучні правялі экскурсію па школьным музеі. А ў актавай зале ўжо тым часам сабралася цэлая аўдыторыя. Вучні хацелі не толькі пачуць чэмпіёнак, але і самі рыхтаваліся паказаць свае таленты. Перад гасцямі выступілі пераможцы нядаўняга абласнога фестывалю міжкультурных камунікацый. Яны занялі два трэція месцы.
Адзінаццацікласніца Ганна Корсак прэзентавала тэму «О спорт, ты мір!» у намінацыі «Я – гід». Вучаніца запрасіла на радзіму свайго вядомага земляка, выпускніка СШ №1 чэмпіёна свету па самба Сцяпана Попава. У наступным нумары на сцэну выйшлі «прадстаўнікі розных моладзевых субкультур». Ад скінхэдаў з бітамі да готаў у чорным – дзеці добра ўвайшлі ў ролю, здзівіўшы яркім шоў, паказаным на фестывалі ў намінацыі «Прэс-цэнтр».
Потым гасцей з аўдыторыяй пазнаёміла настаўніца англійскай мовы Таццяна Ясінская. Джулі Чу — адна з самых вопытных гульцоў жаночай хакейнай зборнай ЗША. У яе калекцыі чатыры алімпійскія медалі (тры сярэбраныя і бронзавы) і пяць залатых медалёў чэмпіянатаў свету. У 2007 годзе выпускніца Гарвардскага ўніверсітэта была ўдастоена прэстыжнай прэміі імя Пэці Кэзмайер, якая прысуджаецца найбольш выдатным хакеісткам на ўніверсітэцкім узроўні. На цырымоніі закрыцця Алімпійскіх гульняў у Сочы ёй выпаў гонар быць сцяганосцам зборнай ЗША. Хілары Найт — выпускніца Універсітэта штата Вісконсін, уладальніца двух сярэбраных алімпійскіх медалёў і чатырох залатых медалёў чэмпіянатаў свету.
Пасланкі спорту ЗША прыбылі ў Беларусь у межах чэмпіянату свету па хакеі. Яны ўдзельнічаюць у арганізаваных амерыканскай дыпмісіяй мерапрыемствах: сустракаюцца з трэнерамі мясцовых хакейных каманд, праводзяць заняткі з маладымі гульцамі і спартсменамі-інвалідамі, выступаюць перад аўдыторыямі навучальных устаноў, а таксама наведваюць матчы чэмпіянату свету.
Супрацоўнічаць з амерыканскім пасольствам СШ №1 пачала даўно. Яшчэ ў 1996 годзе настаўніцы англійскай мовы Таццяна Ясінская, Рэгіна Кутырла, Марына Ключнікава прайшлі рэспубліканскія курсы па ўдасканаленні ведаў замежнай мовы ў Гарадоцкай Акадэміі, арганізаваныя Брытанскім саветам і Амерыканскім Пасольствам. З таго часу педагогаў запрашаюць на міжнародныя канферэнцыі, метадычныя семінары. Так, летась з візітам у Лепелі пабывала выкладчыца са штата Фларыда Бахіа Гіфенбах. Яна, як пераможца праграмы «Fullbright», працавала год на базе Гродзенскага дзяржаўнага ўніверсітэта. На міжнароднай канферэнцыі лепельскія выкладчыкі і пазнаёміліся з ёй, запрасілі ў госці. Цеснае супрацоўніцтва з пасольствам дапамагае шукаць новыя кантакты, арганізоўваць сустрэчы дзяцей з жывымі носьбітамі мовы.
Кацярына АСОЎСКАЯ.