18 жніўня, Мінск /Алена Прус - БЕЛТА/. Дзяржаўная дапамога па доглядзе за дзіцем-інвалідам у 2012 годзе будзе ўстаноўлена ў памеры 100% бюджэту пражытачнага мінімуму. Гэта прадугледжана Нацыянальнай праграмай дэмаграфічнай бяспекі Рэспублікі Беларусь на 2011-2015 гады, паведамілі карэспандэнту БЕЛТА ў Міністэрстве працы і сацыяльнай абароны. Цяпер памер гэтай дапамогі складае 65% БПМ (з 1 жніўня па 31 кастрычніка бягучага года роўны Br287 тыс. 530). Праграмай дэмабяспекі запланаваны і іншыя меры па падтрымцы сем'яў, у якіх выхоўваюцца дзеці-інваліды. Так, у бліжэйшыя гады тэрытарыяльныя цэнтры сацыяльнага абслугоўвання насельніцтва пачнуць аказваць кароткачасовыя паслугі дзённага догляду за дзецьмі няпоўным сем'ям, якія выхоўваюць дзіця-інваліда, і сем'ям, якія выхоўваюць дваіх і больш дзяцей-інвалідаў. Па словах спецыялістаў, кошт гэтай паслугі будзе сацыяльна даступнай. Запрашэнне сацыяльнай няні да дзіцяці-інваліда на дом дасць маме дзіцяці-інваліда ці іншаму сваяку своеасаблівую перадышку. Бо догляд за такімі дзецьмі патрабуе ад блізкіх поўнай самааддачы, яны прысвячаюць гэтай нялёгкай справе практычна ўвесь вольны час, не маючы магчымасці вырашыць нейкія свае асабістыя справы. У рэспубліцы будзе развівацца сістэма сацыяльнага патранату сем'яў у сувязі з нараджэннем дзіцяці-інваліда. Асноўная мэта гэтай новай формы працы - аказанне разнапланавай дапамогі такім сем'ям, прычым да таго, як яны апынуцца ў цяжкай жыццёвай сітуацыі. Гаворка ідзе аб пераадоленні псіхалагічных праблем, матэрыяльнай падтрымцы, прыцягненні пры неабходнасці медыкаў, юрыстаў, іншых спецыялістаў. Таму неабходна будзе наладзіць дакладнае міжведамаснае ўзаемадзеянне. У міністэрстве падкрэслілі, што сацыяльны патранат магчымы толькі пры згодзе самой сям'і і будзе з'яўляцца выключна індывідуальным - зыходзячы з патрэб сям'і ў канкрэтных відах дапамогі. У Беларусі налічваецца 25,6 тыс. дзяцей-інвалідаў ва ўзросце да 18 гадоў.-0-

БЕЛТА