5 студзеня, Віцебск /Вольга Багачова - БЕЛТА/. ААТ "Пастаўскі малочны завод" плануе запусціць новы цэх па вытворчасці сыроў у канцы 2012 года, паведамілі карэспандэнту БЕЛТА на прадпрыемстве. Новая вытворчасць, якая фактычна ўяўляе сабой міні-завод па выпуску цвёрдых сыроў магутнасцю 20 т/сутак, разгорнецца на вольнай пляцоўцы каля адміністрацыйнага будынка прадпрыемства. У цяперашні час тут ужо закладзены падмурак будучага цэха памерам 48х96 м, пракладзены падземныя камунікацыі, у бліжэйшыя дні плануецца прыступіць да будаўніча-мантажных работ самога будынка цэха, які будзе сабраны з металаканструкцый. Асноўную тэхналагічную лінію чэшскай вытворчасці для выпуску сыроў прадпрыемства ўжо набыло, а на працягу года завод дадаткова закупіць дапаможнае абсталяванне для атрымання холаду, ачысткі і падрыхтоўкі малака. Завод выпусціў летась прадукцыі на Br103 млрд, або 175% да ўзроўню 2010-га. Рэнтабельнасць продажаў склала 4%, экспарт павялічыўся на 30% да $9,4 млн. Пастаўкі прадукцыі ажыццяўляліся ў Расію, Германію, Польшчу, Сінгапур, Літву. Удзельная вага экспарту ў выручцы ад рэалізацыі склала 40%, паказчык па энергазберажэнні - мінус 6%. Аб'ём інвестыцый на 2012 год плануецца ў памеры звыш Br50 млрд. У 2011 годзе ў развіццё вытворчасці пастаўскага прадпрыемства ўкладзена Br60 млрд. Асноўны аб'ём сродкаў накіраваны на рэалізацыю праекта па стварэнні новай сырнай вытворчасці. Значным для прадпрыемства праектам стала і будаўніцтва новых ачышчальных збудаванняў, разбітае на два этапы. Першы пускавы комплекс гэтага праекта, які завяршыўся ў снежні, прадугледжваў будаўніцтва ачышчальных збудаванняў, пад'язной дарогі, каналізацыйнай помпавай станцыі, забеспячэнне ачышчальных збудаванняў электраэнергіяй, пракладку напорных трубаправодаў ачышчаных сцёкавых вод і замену існуючага каналізацыйнага калектара. Яго кошт склаў каля Br8 млрд. Другі пускавы комплекс, які ўключае будаўніцтва напорных трубаправодаў ачышчаных сцёкавых вод ад кропкі ўрэзкі да існуючых біясажалак завода, плануецца выканаць у першым паўгоддзі гэтага года.