Пастаянная камісія па супрацоўніцтве будзе створана паміж Віцебскам і Харбінам. Такой дамоўленасці дасягнулі сёння на сустрэчы намеснік мэра Народнага ўрада горада Харбін (Кітайская Народная Рэспубліка) Чжы Даюн і старшыня Віцебскага гарвыканкама Віктар Нікалайкін, перадае карэспандэнт БЕЛТА.
У склад камісіі ўвойдуць спецыялісты розных падраздзяленняў Віцебскага гарвыканкама і адміністрацыі Харбіна, якія будуць ажыццяўляць узаемадзеянне на міждзяржаўным узроўні па сваіх напрамках, шукаць узаемавыгадныя праекты і курыраваць іх.
Сфера агульных інтарэсаў, праца па якіх актыўна разгорнецца ўжо ў бліжэйшы час, таксама вызначана. У прыватнасці, у фармацэўтычнай галіне кітайскі бок праявіў зацікаўленасць да стварэння супольных прадпрыемстваў па выпуску лекаў і ветэрынарных прэпаратаў. Для прапрацоўкі гэтага пытання члены кітайскай дэлегацыі азнаёміліся сёння з працай ААТ "БелВітуніфарм".
Удзельнікі сустрэчы дамовіліся пашырыць культурныя кантакты, прасоўваць супольныя праекты ў адукацыйнай сферы. Віктар Нікалайкін адзначыў, што ў цяперашні час кітайская мова вывучаецца толькі ў адной школе Віцебска - СШ №44, праект рэалізуецца ў супрацоўніцтве з пасольствам КНР у Беларусі і інстытутамі Канфуцыя пры БДУ і БДПУ. У найбліжэйшай перспектыве колькасць такіх устаноў адукацыі ў абласным цэнтры плануецца павялічыць. Таксама трэба будзе наладзіць рэгулярны абмен вучнямі і педагогамі на ўзроўні сярэдніх школ.
Беларусь і Кітай плануюць аб'явіць 2018 год Годам турызму паміж краінамі. У межах яго правядзення ўдзельнікі сустрэчы таксама маюць намер рэалізаваць супольныя праекты.
Акрамя таго, абмяркоўваліся пытанні пастаўкі ў Харбін мяса-малочнай прадукцыі, абутку віцебскіх прадпрыемстваў. Разглядалася магчымасць выкарыстання віцебскага аэрапорта з пункту гледжання лагістыкі.
"Нам удалося дасягнуць адзінства па многіх пытаннях у культуры, турызме, фармацэўтычнай галіне, іншых сферах. Па кожным з гэтых напрамкаў трэба будзе распрацаваць кароткатэрміновыя і доўгатэрміновыя праекты працы", - падкрэсліў у канцы сустрэчы Чжы Даюн.