29 кастрычніка, Мінск /Ганна Кацікава - БЕЛТА/. Цеплыня чакаецца ў Беларусі да канца бягучага тыдня. Пра гэта паведаміў сёння на анлайн-відэабрыфінгу начальнік службы гідраметэаралагічных прагнозаў Рэспубліканскага гідраметцэнтра Дзмітрый Рабаў, перадае карэспандэнт БЕЛТА. Стабільнага надвор'я на наступным тыдні ў краіне не прагназуецца. Па словах сіноптыка, у першай яе палове захаваецца холад і складаныя ўмовы надвор'я, цеплыня чакаецца толькі да канца тыдня. На большай частцы тэрыторыі краіны 30 кастрычніка пройдзе снег. На паўднёвым усходзе чакаецца снег з дажджом, слабы галалёд. Удзень месцамі па краіне пройдуць моцныя ападкі, у многіх раёнах краіны на дарогах утворыцца галалёдзіца, месцамі згусціцца туман. Уночы тэмпература паветра складзе 1-8 градусаў ніжэй за нуль, на паўднёвым усходзе чакаецца да нуля - плюс 3 градусаў. Удзень тэмпература будзе вагацца ад мінус 3 да плюс 3 градусаў. Кароткачасовы снег чакаецца ў сераду, 31 кастрычніка, на большай тэрыторыі Беларусі. Удзень па паўднёвым захадзе краіны пройдзе снег з дажджом. Уночы тэмпература паветра складзе нуль - мінус 5 градусаў, пры праясненнях чакаецца да 8 градусаў марозу. Удзень тэмпература паветра будзе вагацца ад мінус 3 па паўночным усходзе да плюс 5 па паўднёвым захадзе краіны. У сувязі са складанымі ўмовамі надвор'я сіноптыкі прагназуюць галалёдзіцу на многіх участках дарог. Пачынаючы з першых лікаў лістападапада ў Беларусі пачне цяпліцца. "На тэрыторыю краіны будзе паступаць цёплае паветра з паўднёвых шырот. Тэмпература паветра пачне расці і снежны полаг паступова растане", - адзначыў Дзмітрый Рабаў. У чацвер месцамі па краіне пройдуць невялікія кароткачасовыя ападкі ў выглядзе мокрага снегу і дажджу. У некаторых раёнах згусціцца туман, на дарогах магчымы галалёд. У начныя і ранішнія гадзіны на асобных участках дарог галалёдзіца. Уночы тэмпература паветра будзе вагацца ад мінус 6 да плюс 1 градуса, пры праясненнях - да 8-10 градусаў марозу. Удзень чакаецца ад мінус 1 да плюс 6 градусаў, па паўднёвым захадзе краіны - да 8 градусаў цяпла. На большай частцы тэрыторыі краіны ў пятніцу, 2 лістапада, пройдуць ападкі, у асноўным у выглядзе дажджу. Месцамі згусціцца туман. На дарогах у паўночна-ўсходніх рэгіёнах магчымы слабы галалёд. Уночы тэмпература будзе ад мінус 2 градусаў па паўночным усходзе да плюс 6 па паўднёвым захадзе краіны. Удзень паветра прагрэецца да плюс 1-8 градусаў, у паўднёва-заходніх раёнах слупок тэрмометра паднімецца да плюс 12.