11 кастрычніка, Віцебск /Вольга Багачова - БЕЛТА/. Рабаванне і крадзеж раскрыты ў Віцебску дзякуючы сістэмам відэаназірання, паведамілі карэспандэнту БЕЛТА ў аддзяленні інфармацыі і грамадскіх сувязяў УУС Віцебскага аблвыканкама. Адно са злачынстваў было здзейснена ў мэблевай краме. Малады мужчына, скарыстаўшыся хвілінай, калі прадаўцы адцягнуліся, вынес з крамы два крэслы коштам больш за Br700 тыс. кожнае. Супрацоўнікі аддзела крымінальнага вышуку Першамайскага РАУС, прагледзеўшы запіс камер відэаназірання, размешчаных у краме, устанавілі, што да здзяйснення крадзяжу датычны мясцовы жыхар. 30-гадоваму мужчыну пагражае да чатырох гадоў пазбаўлення волі. Яшчэ адзін выпадак адбыўся на вуліцы Кутузава. У пажылой жыхаркі абласнога цэнтра злачынец выхапіў з рук сумачку і знік. Нарад міліцыі, які прыбыў на месца здарэння, паспрабаваў аднавіць абставіны, што папярэднічалі нападу рабаўніка. Аказалася, што пацярпелая ішла з харчовай крамы. Здагадка, што зламыснік вёў сваю ахвяру адтуль, пазней пацвердзілася. На відэазапісе з камеры назірання крамы ўвагу міліцыянераў прыцягнуў мужчына гадоў сарака, які знаходзіўся побач з жанчынай, калі тая рабіла пакупкі. А прадавец успомніла і тое, што мужчына кудысьці хутка знік, а потым з'явіўся зноў: у краме заставалася яго знаёмая. Пара, паспяшаўшыся, сышла. Агледзеўшы ўважліва месца нападу, супрацоўнікі выявілі адарваныя ручкі ад сумачкі, кашалёк, банкаўскую картку. Злоўлены здабытак рабаўніка быў невялікі - Br25 тыс. Праз шэсць гадзін асобу зламысніка ўстанавілі. Ім аказаўся неаднаразова асуджаны мясцовы жыхар, які з'яўляецца на дадзены момант дырэктарам ТАА. У дачыненні да падазронага ўзбуджана крымінальная справа па арт.206 ч.2 КК Рэспублікі Беларусь, якая прадугледжвае максімальнае пакаранне да шасці гадоў пазбаўлення волі.-0-