Апошнімі гадамі ніводнае навагодняе мерапрыемства не абыходзіцца без выкарыстання піратэхнічных вырабаў. Бэнгальскія агні, хлапушкі, салюты, феерверкі, петарды, ракеты, безумоўна, дапаўняюць святочную атмасферу. Аднак свята можа ператварыцца ў трагедыю ў выпадку выкарыстання кантрафактнай прадукцыі або няўмелага абыходжання з піратэхнікай.
Неабходна ведаць, што піратэхнічныя вырабы пажара- і выбуханебяспечныя, іх выкарыстанне ўяўляе пагрозу для здароўя і бяспекі грамадзян, парушае іх спакой.
Выкарыстанне піратэхнікі дзецьмі недапушчальна. Продаж гэтых вырабаў асобам, што не дасягнулі 15 гадоў, у Рэспубліцы Беларусь строга забаронены.
Рэкамендацыі па набыцці піратэхнічных вырабаў
Набываючы піратэхнічны выраб, пакупнік мае права запатрабаваць ад прадаўца прад'яўленне сертыфіката адпаведнасці патрабаванням тэхнічнага рэгламенту Мытнага саюза «Аб бяспецы піратэхнічных вырабаў».
Не варта купляць петарды, ракеты, салюты з рук! Несертыфікаваная прадукцыя ўяўляе вялікую небяспеку.
Набываючы піратэхніку, абавязкова неабходна праверыць наяўнасць інструкцыі па ўжыванні, якая павінна быць на рускай або беларускай мове.
Рэкамендацыі па бяспечным выкарыстанні піратэхнічных вырабаў
Як паказвае вопыт, прычынай трагедыі могуць стаць не столькі самі феерверкі, колькі недарэчнае і няўмелае іх выкарыстанне.
У навагоднюю ноч траўмы рознай ступені цяжкасці штогод атрымліваюць дзясяткі нашых грамадзян, гараць кватэры і жылыя дамы. І прычына часта заўсёды адна – халатнае стаўленне да піратэхнікі. Дарослыя нярэдка дазваляюць сабе ў стане алкагольнага ап'янэння выкарыстоўваць піратэхніку, ігнаруючы патрабаванні бяспекі, падвяргаючы небяспецы сябе і сваіх блізкіх. Бацькі грэбуюць размовамі з дзецьмі аб небяспеках, якія хаваюць у сабе на выгляд бяскрыўдныя феерверкі і хлапушкі.
Каб не стаць ахвярай няшчаснага выпадку, варта памятаць, што прымяненне піратэхнікі ў памяшканнях недапушчальна, а пры запуску ракеты ці феерверка на вуліцы неабходна выконваць элементарныя патрабаванні бяспекі, выкладзеныя ў інструкцыі па ўжыванні.
Спецыялісты нагадваюць асноўныя патрабаванні бяспечнага запуску піратэхнічнага вырабу:
размяшчайце выраб на роўнай паверхні, не бліжэй за 30 м ад людзей, будынкаў, дрэў, дарог;
вызваліце і распраўце запальніцу;
абавязкова прыміце меры па недапушчэнні перакульвання вырабу падчас яго працы;
падпаліце канец запальніцы з падветранага боку на адлегласці выцягнутай рукі (не нахіляючыся над вырабам) і неадкладна адыдзіце на бяспечную адлегласць спінай да вырабу.
Калі феерверк не атрымалася запусціць з першага разу, ніколі не спрабуйце паўтарыць гэту спробу яшчэ раз!
Не выкарыстоўвайце піратэхніку пры ветры больш за 15 м/с.
Адмоўцеся ад ідэі пераробкі і разборкі вырабу.
Не носіце піратэхніку ў кішэнях.
І самае галоўнае – не накіроўвайце ракеты і феерверкі на людзей!
ПАМЯТАЙЦЕ: піратэхніка – гэта небяспечна і вельмі сур'ёзна!
Калі ўсё ж з вамі ці з вашымі блізкімі адбыўся няшчасны выпадак, неабходна неадкладна паведаміць у службу выратавання па тэлефоне "101"
