Правілы расследавання няшчасных выпадкаў зменены

Пастановай Урада Беларусі ад 31 ліпеня 2015 г. № 654 унесены змяненні і дапаўненні ў «Правілы расследавання і ўліку няшчасных выпадкаў на вытворчасці і прафесійных захворванняў» (далей – Правілы).

Правілы дапоўнены тэрмінам «вытворчая траўма» — пашкоджанне здароўя ў выніку няшчаснага выпадку на вытворчасці.

Удакладнены нормы, якія прадугледжваюць алгарытм дзеянняў арганізацый аховы здароўя, якім сталі вядомы звесткі аб пацыентах (пацярпелых), што атрымалі вытворчую траўму, а таксама нормы, якія вызначаюць парадак паводзін арганізацыі, на тэрыторыі якой знаходзіўся пацярпелы, і страхавальніка пры атрыманні паведамлення аб няшчасным выпадку, які падпадае пад дзеянне Правілаў.

Расследаванне няшчаснага выпадку на вытворчасці (акрамя групавога, са смяротным зыходам або які прывёў да цяжкіх вытворчых траўм) праводзіцца ўпаўнаважанай службовай асобай арганізацыі з удзелам упаўнаважанага прадстаўніка прафсаюза (іншага прадстаўнічага органа работнікаў), спецыяліста па ахове працы арганізацыі або іншага спецыяліста, на якога ўскладзены адпаведныя абавязкі па ахове працы, або кіраўніка юрыдычнай асобы (індывідуальнага прадпрымальніка), акрэдытаванага на аказанне паслуг у галіне аховы працы, а таксама страхавальніка, пацярпелага і (або) асобы, якая прадстаўляе яго інтарэсы на падставе даверанасці, або аднаго з блізкіх сваякоў загінулага (па іх патрабаванні). Расследаванне ўказаных няшчасных выпадкаў страхавальнікі – фізічныя асобы праводзяць асабіста.

Пры атрыманні паведамлення аб няшчасным выпадку, які падпадае пад дзеянне Правілаў, арганізацыя паведамляе аб няшчасным выпадку страхавальніку на працягу аднаго працоўнага дня пасля атрымання заключэння аб цяжкасці вытворчай траўмы пацярпелага з накіраваннем копіі заключэння аб цяжкасці вытворчай траўмы.

Устаноўлена, што арганізацыя аховы здароўя не пазней трох рабочых дзён з дня атрымання запыту накіроўвае арганізацыі заключэнне аб цяжкасці вытворчай траўмы ўстаноўленай формы. Гэты запыт можа быць накіраваны як у пісьмовай форме, так і ў выглядзе электроннага дакумента, аформленага ў адпаведнасці з заканадаўствам аб электронных дакументах і электронным лічбавым подпісе.

Акт формы НП зноў складаецца ў чатырох экзэмплярах. Чацвёрты экзэмпляр накіроўваецца страхаўніку.

Заяву аб расследаванні няшчаснага выпадку, пра які арганізацыі не паступіла паведамленне на працягу працоўнага дня (расследаванне якога можа доўжыцца на працягу аднаго месяца) можа напісаць не толькі працуючы, але і яго сваякі.

Правілы дапоўнены нормай, у адпаведнасці з якой у выпадку спынення дзейнасці арганізацыі расследаванне няшчасных выпадкаў праводзіцца па заяве пацярпелага або асобы, якая прадстаўляе яго інтарэсы, дзяржаўным інспектарам працы з удзелам прадстаўнікоў страхаўніка і пацярпелага або асобы, якая прадстаўляе яго інтарэсы (па іх патрабаванні). Па выніках расследавання дзяржаўным інспектарам працы складаюцца заключэнне аб няшчасным выпадку і адпаведны гэтаму заключэнню акт формы Н-1 або акт формы НП, зацвярджаемы галоўным дзяржаўным інспектарам працы вобласці (г. Мінска).

Абскардзіць заключэнне аб цяжкасці вытворчай траўмы спачатку неабходна ў галоўныя ўпраўленні, упраўленні (аддзелы) аховы здароўя абласных выканаўчых камітэтаў, камітэт па ахове здароўя Мінскага гарадскога выканаўчага камітэта і Міністэрства аховы здароўя, пасля чаго - у суд.

Аб групавым няшчасным выпадку, няшчасным выпадку са смяротным зыходам арганізацыя, неадкладна паведамляе пералічаныя ў Правілах органы і арганізацыі, а аб няшчасных выпадках, якія прывялі да цяжкіх вытворчых траўм — на працягу аднаго рабочага дня пасля атрымання заключэння арганізацыі аховы здароўя аб цяжкасці вытворчай траўмы пацярпелага.

Змены ўступаюць у сілу 6 верасня 2015 года.