22 снежня, Мінск /Кар. БЕЛТА/. Савет Міністраў Беларусі і Нацыянальны банк зацвердзілі план сумеснх дзеянняў па дасягненні параметраў прагнозу сацыяльна-эканамічнага развіцця, выкананні бюджэту і рэалізацыі Асноўных напрамкаў грашова-крэдытнай палітыкі Рэспублікі Беларусь на 2013 год. Адпаведнае рашэнне прынята сумеснай пастановай ад 13 снежня 2012 года №1150/17, паведамілі БЕЛТА ў прэс-службе беларускага ўрада. План прадугледжвае меры па паляпшэнні інвестыцыйнага клімату, стымуляванні мадэрнізацыі эканомікі, стварэнні высокатэхналагічных вытворчасцей, развіцці малога і сярэдняга прадпрымальніцтва. Усяго ў плане - 27 пазіцый. У прыватнасці, праца з замежнымі інвестарамі і юрыдычнымі асобамі Беларусі будзе арганізавана па прынцыпе аднаго акна. План прадугледжвае забеспячэнне максімальнай дэбюракратызацыі пры ажыццяўленні адміністрацыйных працэдур з уніфікацыяй патрабаванняў да прадастаўляемых дакументаў, тэрмінаў і парадку іх разгляду, уключаючы ўзаемадзеянне паміж дзяржаўнымі органамі з выкарыстаннем сучасных інфармацыйна-камунікацыйных тэхналогій. Будзе спрошчана працэдура ацэнкі аб'ектаў нерухомасці, якія падлягаюць зносу, страт землекарыстальнікаў, затрат на будаўніцтва інжынерных сетак, іншых затрат, якія ўскладаюцца на інвестара ў сувязі з прадастаўленнем зямельнага ўчастка. У абласцях будуць стварацца індустрыяльныя зоны з забеспячэннем неабходнай інфраструктурай за кошт сродкаў мясцовых бюджэтаў для размяшчэння вытворчых аб'ектаў суб'ектамі малога і сярэдняга прадпрымальніцтва. Згодна з планам, новыя прамысловыя арганізацыі і вытворчасці будуць фарміравацца ў раёнах, у якіх паказчыкі па выручцы ад рэалізацыі прадукцыі, тавараў, работ, паслуг у разліку на аднаго занятага ў эканоміцы адстаюць ад сярэднеабласнога ўзроўню. Галоўная мэта пры гэтым - зменшыць дыспрапорцыі ў сацыяльна-эканамічным развіцці і павялічыць эканамічны патэнцыял рэгіёнаў. Асаблівая ўвага ў плане сумеснх дзеянняў Савета Міністраў і Нацыянальнага банка нададзена мерапрыемствам па зніжэнні імпартаёмістасці эканомікі за кошт павышэння энергаэфектыўнасці, зніжэння матэрыялаёмістасці, а таксама забеспячэння беражлівасці.