Мяжа памеру аднаго плацяжу наяўнымі ўстаноўлена ў Беларусі ў памеры 1 тыс. базавых велічынь

20 кастрычніка, Мінск /Кар. БЕЛТА/. У Беларусі гранічны памер аднаго плацяжу наяўнымі грашовымі сродкамі пры правядзенні фізічнай асобай разлікаў, не звязаных з ажыццяўленнем ім прадпрымальніцкай дзейнасці, па аплаце тавараў (работ, паслуг), якія рэалізуюцца юрыдычнымі асобамі і ІП, устаноўлены ў памеры 1 тыс. базавых велічынь (адзін БВ цяпер роўны Br150 тыс.). Гэта прадугледжана ўказам Прэзідэнта Беларусі №493 "Аб развіцці безнаяўных разлікаў", які 18 кастрычніка афіцыйна апублікаваны на Нацыянальным прававым інтэрнэт-партале, паведамляе БЕЛТА.

Такім чынам, юрыдычныя асобы і індывідуальныя прадпрымальнікі пры продажы тавараў, выкананні работ, аказанні паслуг не маюць права прымаць плацёж наяўнымі грашыма ад фізічнай асобы ў памеры, які перавышае гранічны памер плацяжу наяўнымі. Пры гэтым гэтая норма не распаўсюджваецца на плацяжы, якія ажыццяўляюцца шляхам унясення наяўных грошай непасрэдна ў касы банкаў для залічэння на банкаўскія рахункі юрыдычных асоб і індывідуальных прадпрымальнікаў.

Дакументам таксама ўстаноўлена, што да 1 студзеня 2017 года не прызнаюцца аб'ектам падаткаабкладання падаходным падаткам з фізічных асоб даходы, якія выплачваюцца банкамі-рэзідэнтамі, што знаходзяцца на тэрыторыі Беларусі, фізічным асобам у выглядзе працэнтаў ад сумы аплаты тавараў (работ, паслуг) з выкарыстаннем банкаўскіх плацежных картак, сістэм дыстанцыйнага банкаўскага абслугоўвання, але не больш за 2% ад сумы такой аплаты. Ва ўказе таксама гаворыцца, што сумы грашовых сродкаў, выкрадзеныя з рахункаў фізічных асоб, да якіх выпушчаны ў абарачэнне банкаўскія плацежныя карткі, і ў далейшым кампенсаваныя ім банкамі, не прызнаюцца аб'ектам падаткаабкладання падаходным падаткам з фізічных асоб.

Дадзеныя новаўвядзенні, якія накіраваны на павелічэнне ў краіне долі безнаяўных разлікаў, што ажыццяўляюцца фізічнымі асобамі, уступаюць у сілу праз шэсць месяцаў пасля афіцыйнага апублікавання ўказа.

Савету Міністраў і Нацыянальнаму банку належыць у шасцімесячны тэрмін забяспечыць прывядзенне актаў заканадаўства ў адпаведнасць з дадзеным указам і прыняць іншыя меры, накіраваныя на выкананне яго палажэнняў. Гэта даручэнне ўступае ў сілу пасля афіцыйнага апублікавання дакумента.