Прадпрыемствы АПК Віцебскай вобласці часцей за іншых суб'ектаў гаспадарання парушаюць прыродаахоўнае заканадаўства
14.5.20120 праглядаў
14 мая, Віцебск /Вольга Багачова - БЕЛТА/. Сельгаспрадпрыемствы Віцебскай вобласці часцей за іншых суб'ектаў гаспадарання рэгіёна парушаюць прыродаахоўнае заканадаўства. Такое меркаванне выказала карэспандэнту БЕЛТА старэйшы памочнік пракурора Віцебскай вобласці па наглядзе за выкананнем прыродаахоўнага заканадаўства Валянціна Хадосевіч па выніках праверкі выканання заканадаўства аб забаронах і абмежаваннях гаспадарчай і іншай дзейнасці ў водаахоўных зонах і прыбярэжных палосах водных аб'ектаў.
Па словах Валянціны Хадосевіч, найбольш распаўсюджаныя і істотныя парушэнні прыродаахоўнага заканадаўства ў водаахоўных зонах і прыбярэжных палосах вадаёмаў дапускаюць прадпрыемствы аграпрамысловага комплексу, якія маюць у складзе жывёлагадоўчыя фермы і комплексы. "Пачынаючы з 2009 года пракуратурай вобласці на гэты факт неаднаразова звярталася ўвага Віцебскага аблвыканкама. Для вырашэння дадзенай праблемы ў лістападзе мінулага года старшынёй аблвыканкама быў зацверджаны План мерапрыемстваў па паляпшэнні экалагічнага стану водных аб'ектаў вобласці на 2011-2015 гады, які прадугледжвае вынас за межы водаахоўных зон 90 сельскагаспадарчых аб'ектаў", - сказала Валянціна Хадосевіч.
"Праверка паказала, што пакуль становішча спраў па дадзеным пытанні ў лепшы бок істотна не змянілася", - канстатавала яна. Так, парушэнні прыродаахоўнага заканадаўства ўстаноўлены ў Сенненскім раёне на фермах ААТ "Сенненскі райаграсэрвіс", "Сінегорскае", "Ульянавічы" і "Белая Ліпа". Небяспечна для навакольнага асяроддзя працуюць некаторыя сельскагаспадарчыя прадпрыемствы ў Лёзненскім раёне. Напрыклад, на ферме ў вёсцы Рублёва з 2010 года не прынята ніякіх мер па пераносе месца выгулу для жывёлы, размешчанага на мяжы водаахоўнай зоны і прыбярэжнай паласы ракі Чарніца, што стварае рэальную пагрозу забруджвання дадзенага воднага аб'екта.
У Браслаўскім раёне на жывёлагадоўчым комплексе на 5 тыс. галоў у вёсцы Лайбуны (ААТ "Агравідзы") з-за адсутнасці кантролю за злівам вадкіх фракцый арганікі па трубаправодзе, размешчаным у водаахоўнай зоне ракі Маруга, яны разцякаюцца па прылеглай да поля тэрыторыі, забруджваючы ўчастак зямлі Нацыянальнага парка "Браслаўскія азёры". Парушэнні рэжыму ўтрымання водаахоўных зон і прыбярэжных палос устаноўлены таксама ў Расонскім, Верхнядзвінскім, Гарадоцкім, Дубровенскім, Мёрскім, Аршанскім, Полацкім, Талачынскім, Шаркаўшчынскім, Бешанковіцкім, Віцебскім, Глыбоцкім, Докшыцкім, Ушацкім і Чашніцкім раёнах.
Асаблівая ўвага пры праверцы была звернута на законнасць будаўніцтва, рэканструкцыі і эксплуатацыі аб'ектаў нерухомасці ў межах водаахоўных зон і прыбярэжных палос. У дадзеным выпадку парушэнні выяўлены ў прыбярэжных палосах у Аршанскім, Ушацкім, Гарадоцкім, Полацкім, Браслаўскім раёнах.
Парушэнні, якія заключаюцца ў наяўнасці несанкцыянаваных звалак бытавых адходаў, устаноўлены таксама ў водаахоўнай зоне і прыбярэжнай паласе ракі Заходняя Дзвіна ў Віцебску. У Полацку выяўлены факт неналежнай эксплуатацыі ачышчальных збудаванняў заводам "Праммашрамонт", які знаходзіцца ў водаахоўнай зоне ракі Полата. З гэтай нагоды накіравана даручэнне ў Рэспубліканскі цэнтр аналітычнага кантролю ў галіне аховы навакольнага асяроддзя аб адборы і даследаванні проб вады.
У мэтах ліквідацыі парушэнняў пракурорамі падрыхтавана 77 актаў рэагавання, у тым ліку 19 прадстаўленняў і 58 прадпісанняў. Для вырашэння пытання аб прыцягненні вінаватых да адміністрацыйнай адказнасці кантралюючымі прыродаахоўнымі органамі накіраваны даручэнні аб падрыхтоўцы адміністрацыйных спраў у дачыненні да 100 асоб. Вынікі праверкі выканання заканадаўства аб забаронах і абмежаваннях гаспадарчай і іншай дзейнасці ў водаахоўных зонах і прыбярэжных палосах водных аб'ектаў разгледжаны на пасяджэнні калегіі пракуратуры вобласці. Акрамя таго, у Віцебскі аблвыканкам падрыхтавана прадстаўленне, у якім пастаўлена пытанне аб прыцягненні да дысцыплінарнай адказнасці службовых асоб райвыканкамаў і камітэта па сельскай гаспадарцы і харчаванні аблвыканкама, якія не забяспечылі належны кантроль за навядзеннем парадку на фермах і іншых аб'ектах прадпрыемстваў аграпрамысловага комплексу, што абумовіла забруджванне водных рэсурсаў або стварыла рэальную пагрозу іх забруджвання.-0-
БЕЛТА