7 снежня, Віцебск /Дзіяна Курыла - БЕЛТА/. Прадпрыемствы ЖКГ у Віцебскай вобласці завяршылі работу па экалагічным нармаванні выкідаў у атмасферу ад кацельняў на мясцовых відах паліва (МВП), паведамілі карэспандэнту БЕЛТА ў Віцебскім абласным камітэце прыродных рэсурсаў і аховы навакольнага асяроддзя. Патрабаванне выканання экалагічных стандартаў пры спальванні МВП важна перш за ўсё таму, што ацяпляльныя кацельні размешчаны ў населеных пунктах у непасрэднай блізкасці ад жылля. З улікам сучаснай шматпавярховай забудовы, якая прысутнічае і ў малых гарадах, і параўнальна невысокіх комінах кацельняў не заўсёды забяспечваецца рассейванне забруджвальных рэчываў у атмасферным паветры да неабходных санітарных нормаў, растлумачылі спецыялісты. Разам з тым аналіз вынікаў нармавання выкідаў забруджвальных рэчываў у складзе дымавых газаў з катлоў, якія спальваюць біямасу (драўніну і яе адходы), паказаў, што па многіх катлах выкіды вуглякіслага газу перавышаюць устаноўленыя межы (ад 1,5 да 5 разоў, асабліва для малых катлоў), а выкіды цвёрдых часціц практычна заўсёды вышэй за ўстаноўленыя межы (часам дасягаецца 30-кратнае перавышэнне). Дынаміка змянення валавых выкідаў забруджвання атмасфернага паветра паказвае рост аб'ёмаў забруджвальных рэчываў ад прадпрыемстваў ЖКГ за апошнія гады ў сувязі з выкананнем праграмы пераводу на МВП. Калі ў 2009 годзе валавыя выкіды склалі 6,4 тыс.т шкодных рэчываў, то па выніках 2010 года - 6,8 тыс.т. У Віцебскай вобласці асноўнымі спажыўцамі МВП з'яўляюцца ацяпляльныя кацельні жыллёва-камунальнай гаспадаркі. Больш за 90% у балансе МВП у кацельнях складае выкарыстанне дроў, шчэпак, драўняных адходаў, часткова выкарыстоўваецца торф. Прадпрыемствам ЖКГ па кацельнях на МВП устаноўлены часовыя нарматывы выкідаў, пазначаны тэрміны выканання комплексу мерапрыемстваў па забеспячэнні экалагічных патрабаванняў у адпаведнасці з патрабаваннямі дзяржаўных стандартаў. Напрыклад, 22 катлы Віцебскага прадпрыемства кацельняў і цеплавых сетак не адпавядаюць патрабаванням экалагічных стандартаў па вокісе вугляроду і вокісах азоту, па двух катлах перавышаюцца нормы па канцэнтрацыях цвёрдых часціц. Тэрмін правядзення рэжымна-наладачных работ па гэтых катлах і мадэрнізацыі або замены газаачышчальнага абсталявання на сістэме выдалення дымавых газаў устаноўлены планам мерапрыемстваў і асаблівымі ўмовамі дазволу на выкіды да 31 снежня 2012 года.