Выступленне Прэзідэнта Беларусі Лукашэнкі А.Г. на пасяджэнні Савета кіраўнікоў дзяржаў Шанхайскай арганізацыі супрацоўніцтва ў фармаце відэаканферэнцыі
Паважаны спадар Модзі (прэм'ер-міністр Індыі Нарэндра Модзі. - Заўв. БЕЛТА)!
Паважаныя сябры!
Дазвольце ад імя беларускага народа прывітаць удзельнікаў Савета кіраўнікоў дзяржаў Шанхайскай арганізацыі супрацоўніцтва.
Спадзяюся, што наступнае пасяджэнне мы зможам правесці ў вочным фармаце. Здаецца, і пандэмія скончылася.
Перакананы, з прыходам у ШАС такой магутнай дзяржавы з найбагацейшай гісторыяй і культурай, як Ісламская Рэспубліка Іран, і новых партнёраў па дыялогу - Аб'яднаных Арабскіх Эміратаў, Кувейта, М'янмы, Мальдыўскай Рэспублікі - мы станем яшчэ больш згуртаванымі і эфектыўнымі.
Упэўнены, пры падтрымцы ўсіх краін-членаў Беларусь у бліжэйшы час таксама далучыцца ў якасці паўнапраўнага ўдзельніка да Шанхайскай арганізацыі супрацоўніцтва. Мы адпаведную працу правялі і ўдзячныя тым, хто нас у гэтым падтрымлівае.
Тэма нашага саміту - "На шляху да бяспечнай ШАС". Яна надзвычай актуальная ва ўмовах паглыблення крызісу міжнародных адносін.
Трэба прызнаць, ранейшая сістэма бяспекі не была ідэальнай, але тым не менш прадугледжвала механізмы стрымання і проціваг, абавязковасць выканання норм міжнароднага права.
Сёння ж мы бачым поўны злам усіх правілаў і паняццяў. Таму невыпадкова, што ШАС вымушана яшчэ больш сфакусавацца не на пытаннях эканомікі, а на праблемах бяспекі і стабільнасці ў рэгіёне.
Цвёрда адстойваючы прынцыпы пабудовы справядлівага свету для ўсіх без выключэння дзяржаў, Мінск на розных міжнародных пляцоўках пастаянна праводзіць працу па пошуку кампрамісных рашэнняў і выхадаў.
Карыстаючыся магчымасцю, хацеў бы закрануць шэраг актуальных напрамкаў нашага ўзаемадзеяння.
Першае. Усё больш надзённымі з'яўляюцца для краін - удзельніц арганізацыі такія выклікі і пагрозы, як дэструктыўныя кібератакі, крадзеж лічбавых даных, мэтанакіраванае распаўсюджванне фэйкаў у інфармацыйнай прасторы. Пра гэта ўжо гаварылі тыя, хто выступаў.
Гатовы да супрацоўніцтва па гэтым напрамку, уключаючы навучанне спецыялістаў, рэалізацыю сумеснымі праектамі па кібервучэннях, узаемны абмен тэхнічнымі рашэннямі.
Другое. Захад, чапляючыся за мізэрнае дамінаванне ў шэрагу сфер эканомікі і фінансаў, спрабуе стрымаць развіццё непажаданых яму краін і ўводзіць супраць іх незаконныя варварскія санкцыі.
Каб гэтаму эфектыўна супрацьстаяць, Беларусь актыўна прасоўвае ідэю глабальнага развіцця. Паслядоўна выступаем як за стварэнне вялікага Еўразійскага партнёрства з краінамі, з якімі ў нас ужо склаліся цесныя адносіны, - Кітайскай Народнай Рэспублікай, Індыяй, Пакістанам, Іранам, нашымі партнёрамі СНД, так і за спалучэнне фарматаў Еўразійскага эканамічнага саюза, ШАС і БРІКС у шырокім кантэксце.
Трэцяе. Важны складнік пастаяннага тэхналагічнага развіцця - гэта абмен вопытам і назапашанымі ведамі.
У якасці аднаго з магчымых пілотных праектаў на платформе ШАС прапануем падрыхтаваць праграму аб'яднання інфармацыйных рэсурсаў цэнтраў трансферу тэхналогій. Так мы зможам стымуляваць працэсы прасоўвання і камерцыялізацыі навукова-тэхнічных праектаў.
Чацвёртае. Ва ўмовах абвастрэння праблем глабальнай харчовай бяспекі дзяржавы ШАС могуць разлічваць на магчымасці Беларусі як аднаго з найбуйнейшых экспарцёраў мінеральных угнаенняў, сельскагаспадарчай прадукцыі, харчавання і тэхнікі.
Для фінансавага суправаджэння гандлёвых кантрактаў і рэалізацыі розных праектаў Беларусь усяляк падтрымлівае ідэю прапрацоўкі ініцыятывы стварэння Банка развіцця ШАС. Дарэчы, да гэтай праблемы мы ўжо звярталіся ў свой час.
Пятае. Мінск захоўвае зацікаўленасць у трансфармацыі агульнай транспартна-лагістычнай прасторы ШАС, у тым ліку шляхам актывізацыі міжнародных перавозак, паскарэння і лічбавізацыі працэдур кантролю, уладкавання і эксплуатацыі транспартнага калідора Поўнач - Поўдзень.
Шостае. Для больш блізкага знаёмства з разнастайнасцю культур нашай арганізацыі прапануем разгледзець магчымасць рэалізацыі маштабнага сумеснaга праекта - Фестывалю культур ШАС, зрабіўшы яго традыцыйным.
Сёмае. Усе нашы планы рызыкуюць застацца на паперы, калі не ўзмацнім працу з падрастаючым пакаленнем. Шмат што з таго, што мы зараз абмяркоўваем, будуць рэалізоўваць сённяшнія студэнты. Трэба падумаць над стварэннем платформы "ШАС для моладзі".
Паважаныя калегі!
Завяршаючы сваё выступленне, хачу павіншаваць Астану з прыняццем старшынства ў Шанхайскай арганізацыі супрацоўніцтва.
Не сумняваюся, што пад старшынствам Казахстана ШАС атрымае новы імпульс у сваім развіцці.
Дзякую вам за ўвагу.
Крыніца: belta.by