Прыём дакументаў на выдачу дазволаў на мясцовы прымежны рух жыхароў Беларусі і Латвіі пачынаецца з 1 лютага
1.2.20120 праглядаў
1 лютага, Віцебск /Кар. БЕЛТА/. У адпаведнасці з пагадненнем паміж урадамі Беларусі і Латвіі аб спрошчаным парадку ўзаемных паездак жыхароў памежных тэрыторый ад 23 жніўня 2010 года консульскія ўстановы пачынаюць прыём дакументаў на выдачу дазволаў з 1 лютага. Консульства Латвійскай Рэспублікі ў Віцебску гатова да прыёму дакументаў, паведаміла карэспандэнту БЕЛТА кіраўнік консульства Латвіі ў Віцебску Дагнія Лацэ-Атэ.
У консульства паступілі спісы жыхароў памежных тэрыторый Віцебскай вобласці, якія пажадалі скарыстацца магчымасцю мясцовага памежнага руху. Спісы сфарміраваны мясцовымі сельскімі, пасялковымі і гарадскімі выканкамамі на падставе заяў грамадзян. З беларускага боку ў іх увайшло каля 200 чалавек. Як адзначыла Дагнія Лацэ-Атэ, гэтыя пералікі не канчатковыя. Грамадзяне могуць падаваць заявы па меры неабходнасці, і кожныя тры месяцы спісы будуць абнаўляцца. Наступны будзе сфарміраваны да 1 красавіка, а прыём заяў на выдачу дазволаў ужо па абноўленых спісах консульства пачне з 1 мая.
Падставай для выдачы дазволу могуць служыць наведванне сваякоў, арганізацыя або ўдзел у культурных, адукацыйных, навуковых і спартыўных мерапрыемствах, якія праводзяцца органамі ўлады і ўстановамі Беларусі і Латвіі, валоданне нерухомасцю, наведванне месцаў пахавання сваякоў, атрыманне медыцынскай дапамогі, удзел у мерапрыемствах, звязаных з мясцовымі традыцыямі і правядзеннем рэлігійных абрадаў, рэгулярныя бізнес-кантакты.
Для атрымання дазволу неабходна прадставіць у консульства пашпарт, патрабаванні да яго такія ж, як і пры выдачы віз: ён павінен быць не старэйшы за дзесяць гадоў, быць сапраўдным не менш чым тры месяцы пасля заканчэння тэрміну дзеяння дазволу, і анкету на атрыманне дазволу. Яе можна запоўніць непасрэдна ў консульстве, а можна надрукаваць з сайта http://www.mfa.gov.lv/by/belarus/konsulate/ і прадставіць ужо запоўненую.
Пагадненнем аб спрошчаным парадку ўзаемных паездак жыхароў прыгранічных тэрыторый Беларусі і Латвіі прадугледжваецца спрошчаны парадак перасячэння дзяржаўнай мяжы жыхарамі прыгранічных тэрыторый, якія пастаянна пражываюць на гэтых тэрыторыях не менш за адзін год, незалежна ад іх грамадзянскай прыналежнасці, пры наяўнасці дазволу на мясцовае памежнае перамяшчэнне, выдадзенага кампетэнтным органам іншага боку, і праязнога дакумента (пашпарта альбо іншага дакумента, прадугледжанага заканадаўствам). Дазвол будзе выдавацца на тэрмін ад 1 да 5 гадоў. Кошт збору за прыняцце і разгляд заявы аб выдачы дазволу вызначаецца ў памеры 20 еўра. Пры гэтым ад выплаты збору на аснове ўзаемнасці могуць быць вызвалены пенсіянеры, інваліды і дзеці да 18 гадоў.
Таксама ўстаноўлены пералік адміністрацыйна-тэрытарыяльных адзінак на тэрыторыі кожнага з бакоў, які вызначае прыгранічную тэрыторыю, прылеглую да беларуска-латвійскай мяжы і якая знаходзіцца ў зоне не больш за 30 км ад яе. Калі частка такога ўтварэння знаходзіцца ў зоне ад 30 да 50 км ад мяжы, то гэта ўтварэнне таксама лічыцца часткай прыгранічнай тэрыторыі. У адпаведнасці з пералікам, да прыгранічных тэрыторый аднесены Бігосаўскі, Чапаеўскі, Сар'янскі, Асвейскі, Коханавіцкі, Белькаўшчынскі сельсаветы Верхнядзвінскага раёна, горад Верхнядзвінск; Повяцкі, Перабродскі, Долгінаўскі, Міёрскі, Новапагосцкі, Туркоўскі сельсаветы Міёрскага раёна, горад Міёры; Друеўскі, Плюскі, Слабодскоўскі, Апсаўскі, Далякоўскі, Ахрэмаўскі, Межанскі, Цецяркоўскі, Відзаўскі сельсаветы Браслаўскага раёна, горад Браслаў, пасёлак Відзы.
Жыхары прыгранічных тэрыторый дзяржавы аднаго боку, выкарыстоўваючы дазвол мясцовага памежнага перамяшчэння, падчас знаходжання на тэрыторыі дзяржавы іншага боку абавязаны выконваць заканадаўства гэтай дзяржавы. Так, яны не могуць выязджаць за межы прыгранічнай тэрыторыі, а жыхары прыгранічных тэрыторый Латвіі падчас знаходжання на тэрыторыі Рэспублікі Беларусь абавязаны зарэгістравацца ва ўстаноўленым парадку.
З даты ўступлення ў сілу пагаднення спыняе сваё дзеянне пагадненне паміж Урадам Рэспублікі Беларусь і Урадам Латвійскай Рэспублікі аб спрошчаным парадку выдачы віз прыгранічнаму насельніцтву ад 27 лістапада 2002 года. Разам з тым візы, выдадзеныя ў адпаведнасці з пагадненнем ад 27 лістапада 2002 года, могуць выкарыстоўвацца да заканчэння ўказанага ў іх тэрміну дзеяння.-0-БЕЛТА